ყვარელში გენდერული თანასწორობის საკითხებზე ორდღიანი სემინარი იმართება. სემინარი - „უსაფრთხოების სექტორში გენდერული თანასწორობის და ქალების, მშვიდობისა და უსაფრთხოების პრინციპების ინტეგრირება" თავდაცვის მინისტრის პირველმა მოადგილემ გოჩა რატიანმა ოფიციალურად გახსნა. სიტყვით გამოსვლისას მან ყურადღება თავდაცვის უწყებაში გენდერულ თანასწორობაზე გაამახვილა.
მოწვეულ სტუმრებს სიტყვით თავდაცვის სამინისტროს გენდერული თანასწორობის მონიტორინგის ჯგუფის წევრებმაც მიმართეს.
სემინარში თავდაცვის სამინისტროს სამოქალაქო ოფისის, საჯარო სამართლის იურიდიული და შეიარაღებული ძალების სტრუქტურული ერთეულების ხელმძღვანელი პირები მონაწილეობენ. ტრენინგებს „ქალთა საინფორმაციო ცენტრისა" და თსუ-ის წარმომადგენლები უძღვებიან. სემინარის განმავლობაში ისინი გაეროს უშიშროების საბჭოს რეზოლუციას N 1325-ს ქალებზე, მშვიდობასა და უსაფრთხოებაზე, ასევე, ნატოს პოლიტიკას გენდერის თემის მიმართ და უსაფრთხოების სექტორში გენდერული თანასწორობის პრინციპების ინტეგრირებასთან დაკავშირებულ საკითხებს გაეცნობიან. სატრენინგო სესიის ფარგლებში, მონაწილეები თავდაცვის სამინისტროს გენდერული თანასწორობის სტრატეგიის შესახებაც იმსჯელებენ.
სემინარი გაეროს ქალთა ორგანიზაციის ხელშეწყობითა და ნორვეგიის მთავრობის ფინანსური მხარდაჭერით ტარდება.
მასალის გამოყენების პირობები