საქართველოს ფიზიკური აღზრდისა და სპორტის სახელმწიფო სასწავლო უნივერსიტეტის მიერ 2013-2015 წლებში გაწეული საქმიანობის ანგარიში მოისმინეს პარლამენტის სპორტისა დახალგაზრდობის საქმეთა კომიტეტის სხდომაზე.
უნივერსიტეტის რექტორის მოვალეობის შემსრულებელმა, ჯემალ ძაგანიამ მოკლედ ისაუბრა უნივერსიტეტის ისტორიაზე მისი დაარსებიდან - 1938 წლიდან დღემდე.
მისი განცხადებით, უნივერსიტეტმა რთული გზა გაიარა, მაგრამ ყველაზე რთული იძულებითი შვიდწლიანი პაუზა იყო, როდესაც 2007 წელს, მთავრობის დადგენილებით, ეს უმაღლესი სასწავლებელი გაუქმდა და იგი ილიას სახელმწიფო უნივერსიტეტს მიუერთეს.
2013 წელს ფიზიკური აღზრდისა და სპორტის სახელმწიფო უნივერსიტეტი კვლავ დაფუძნდა.
დღეს უნივერსიტეტი ახორციელებს უმაღლეს საგანმანათლებლო პროგრამებს, მხარს უჭერს ევროპული განათლების დამკვიდრებისა და პოპულარიზაციის პრინციპებს, ორიენტირებულია მოწინავე სამეცნიერო-კვლევით და სასწავლო-პრაქტიკულ მოდელებზე არსებული კვლევის წარმოებაზე და ინოვაციური განათლების მიღებაზე. უნივერსიტეტის ორ ფაკულტეტზე სწავლება ორსაფეხურიანია (ბაკალავრიატი, მაგისტრატურა), სადაც ამზადებენ მწვრთნელებს და ფიზიკური მედიცინისა და რეაბილიტაციის სპეციალისტებს.
უნივერსიტეტში არის 13 კათედრა, 7 სპორტული დარბაზი, სტადიონი, ჩოგბურთის კორტები, კომპიუტერული კლასი.
ჯემალ ძაგანიამ ისაუბრა უნივერსიტეტის სამომავლო გეგმებზე. დღესვე სპორტისა და ახლაგაზრდულ საქმეთა კომიტეტმა საქართველოს მთამსვლელთა ფედერაციის მიერ გაწეული საქმიანობისა და სამომავლო გეგმების შესახებ ინფორმაცია მოისმინა, რომელიც კანონმდებლებს ფედერაციის პრეზიდენტმა, შოთა მირიანაშვილმა გააცნო.
მისი განცხადებით, საქართველოს მთამსვლელთა ფედერაცია გიორგი ნიკოლაძის მიერ 1924 წელს დაარსებული „მთამსვლა - მგზავროსნობის" სახელით ცნობილი ქართველ მთამსვლელთა პირველი გაერთიანების სამართალმემკვიდრეა და ალპინიზმის როლი განუსაზღვრელად დიდია ფიზიკურად ძლიერი, სულიერად ამაღლებული და პატრიოტი ახალგაზრდა თაობის აღზრდისა და ფორმირების საქმეში. ისაუბრეს ალპინიზმის სირთულეებსა და რისკებზე. ასევე ქართველ ალპინისტთა წარმატებებსა და ფედერაციის სამომავლო გეგმებზე. აქვე ითქვა ისიც, რომ დაფინანსებისა და მატერიალურ - ტექნიკური უზრუნველყოფის შეწყვეტის გამო, სპორტის ეს სახეობა უმძიმეს მდგომარეობაში აღმოჩნდა. ფედერაციის წარმომადგენელთა განცხადებით, არსებული სირთულეების მიუხედავად, სპორტის ეს სახეობა მაინც პოპულარულია. კომიტეტმა ცნობად მიიღო წარმოდგენილი ანგარიშები.