დედაქალაქის მუნიციპალიტეტის საკრებულოს თავმჯდომარემ გიორგი ალიბეგაშვილმა და ჩუღურეთის რაიონის მაჟორიტარმა დეპუტატმა რიმა ბერაძემ ნიკო ფიროსმანის სახლ-მუზეუმი დაათვალიერეს და მუზეუმის წარმომადგენლებს მისი რეაბილიტაციის საკითხთან დაკავშირებული ხედვა გაუზიარეს.
გიორგი ალიბეგაშვილმა ქუჩისა და სახლ-მუზეუმის რეაბილიტაცია-რეკონსტრუქციის ინიციტივის გარდა, ქუჩის გარკვეული ნაწილის სამუზეუმე ქუჩად გადაქცვის სურვილიც გამოთქვა, რაც აღნიშნულ ტერიტორიაზე ნიკო ფიროსმანის მოღვაწეობის ხანისათვის შესაფერისი დუქნების, საცხოვრებელი სივრცისა და კოლორიტის აღდგენას გულისხმობს.
„ყველამ კარგად უწყის, თუ ვინ არის და რას წარმოადგენს ნიკო ფიროსმანი და მისი შემოქმედება ქართველი და არა მხოლოდ ქართველი ერისათვის. მისი ღვითმომადლებული ნიჭი და მისი შემოქმედება არა მხოლოდ ხალხურ ძირებს, არამედ ჩვენი დიდი წინაპრების ფრესკულ ხელოვნებსაც ეფუძნება, რომელიც ჩვენი ეკლესია-მონასტრების კედლებზეა გამოსახული. ამიტომ, მიმაჩნია, რომ კარგი იქნება, თუ ამ ადგილას ისეთი სახელოვნებო მუზუმი გაკეთდება, სადაც შეიკრიბებიან მხატვრები და თავიანთი შემოქმედების ნიმუშებს შექმნიან. და რაც მთავარია, ამით თავად ოსტატის ოცნებას შეესხმება ფრთები.
ამიტომ, ჩვენ მზად ვართ გამოვიჩინოთ მაქსიმალური ყურადღება, რათა მოვახერხოთ იმ იდეის ხორცშესხმა, რაც თბილისის საკრებულოს ფიროსმანის ქუჩასთან და მის სახლ-მუზეუმთან დაკავშირებით გააჩნია და ვფიქრობ, რომ ჩვენ უახლოეს მომავალში დავიწყებთ მუშაობას აღნიშნულთან დაკავშირებით"-განაცხადა გიორგი ალიბეგაშვილმა
როგორც ჩუღურეთის რაიონის მჟორიტარი დეპუტატი რიმა ბერაძე აცხადებს, ფიროსმანის ქუჩა ყველაზე მეტადაა დაზიანებული მიწისძვრისგან და არათუ მუზეუმს, არამედ ქუჩასაც კი, წლების მანძილზე არავითარი ყურადღება არ მიქცევია.
„ჩემი უპირველესი ამოცანაა, ქუჩის და პირველ რიგში სახლ-მუზეუმის რეაბილიტაცია. დღეის მდგომარეობით, სახლ-მუზეუმი კულტურისა და ძეგლთა დაცვის სამინისტროსთან არსებული კულტურული მემკვიდრეობის დაცვის საგენტოს ბალანსზეა და მიმაჩნია, რომ აღნიშნული პრობლემის გადასაჭრელად საჭირო გზების მოძიებისა და განვითარების მიზნით, აუციელბელია ჩვენი ჩართულობა და ზემოთხსენებულ უწყებასთან მჭიდრო თანამშრომლობა. ეს შესაძლებელს გახდის ამ მიმართულებით ჩვენი ყურადღებისა და ძალების მაქსიმალურ მობილიზებას და პრობლემის გონივრულ ვადებში მოგვარებას.
ეს ძალიან მნიშვნელოვანი არა მხოლოდ კულტურული, არამედ კომერციული თვალსაზრისითაცაა და ცხადია, ძალიან მომგებიანი იქნება ჩვენი ქვეყნისათვის"-აღნიშნა რიმა ბერაძემ.
ნიკო ფიროსმანის სახლ-მუზეუმის დირექტორის ანზორ მაძღარაშვილის განცხადებით, ეს პირველი შემთხვევაა, როდესაც თბილისის მუნიციპალიტეტის მხრიდან სახლ-მუზეუმის მიმართ ასეთი დაინტერესება და ყურადღება გამოიჩინეს, რისთვისაც მან დედაქალაქის წარმომადგენლობითი ორგანოს თავმჯდომარეს და რაიონის მაჟორიტარ დეპუტატს მადლობა გადაუხადა.
