თბილისის მუნიციპალიტეტის საკრებულოში ბიუროს სხდომა გაიმართა, რომელზეც დეპუტატებმა ქ.თბილისის 2015 წლის ბიუჯეტით პროგრამების და ქვეპროგრამების ფარგლებში განსახორციელებელ ღონისძიებებზე თანხმობის მიცემის თაობაზე იმსჯელეს.
საკითხი ბიუროს სხდომაზე მას შემდეგ გავიდა, რაც ის საკრებულოს წევრებმა დედაქალაქის მუნიციპალიტეტის საკრებულოს სპორტისა და ახალგაზრდულ საქმეთა კომისიის სხდომაზე განიხილეს და ამავე სხდომაზე 2015 წლის ახალგაზრდული ოლიმპიური ფესტივალის საორგანიზაციო კომიტეტის წარმომადგენლებს მოუსმინეს.
კომიტეტის წარმომადგენლებმა კომისიის წევრებს ფესტივალის პოპულარიზაციის შესახებ ინფორმაცია მიაწოდეს და ამასთან, სარეკლამო ნაწილი წარმოუდგინეს, კერძოდ კი მათ საკალათბურთო სკოლების, საჩოგბურთო კომპლექსის, ტანვარჯიშის დარბაზის და ოლიმპიადის ფარგლებში სხვა სპორტული შენობა-ნაგებობების კაპიტალური შეკეთება-რეაბილიტაციისა და ინვენტარიზაციის საკითხებზე იმსჯელეს.
კომისიის წევრების მხრიდან დასმულ შეკითხვებს თბილისის მერიის ახალგაზრდობის საქმეთა საქალაქო სამსახურის უფროსის მოადგილემ შალვა გოგოლაძემ, საორგანიზაციო კომიტეტის საფინანსო დეპარტამენტის უფროსმა გიორგი მორჩაძემ და კომიტეტის თავმჯდომარის მოადგილემ ინგფრასტრუქტურულ საკითხებში, იოსებ დარჩიამ უპასუხეს. კომისიის წევრებმა დადებითი რეკომენდაციით შეაფასეს აღნიშნული საკითხი და მას ბიუროს სხდომაზე შესათანხმებლად გაიტანენ.