აჭარის მთავრობის თავმჯდომარემ არჩილ ხაბაძემ და აჭარის ჯანმრთელობისა და სოციალური დაცვის მინისტრმა ნუგზარ სურმანიძემ ბათუმის რეფერალურ ჰოსპიტალში ის პაციენტი მოინახულა, რომელსაც საქართველოში პირველად ღვიძლის გადანერგვის ოპერაცია ჩაუტარდა. ქართველმა მედიკოსებმა ღვიძლის გადანერგვის ურთულესი 20 საათიანი ოპერაცია ინდოეთის წამყვანი ქირურგი-ტრანსპლანტოლოგის ხელმძღვანელობით გააკეთეს.
„უპრეცედენტო ოპერაცია ჩატარდა ბათუმში. ყველაფერმა კარგად ჩაიარა და პაციენტი თავს კარგად გრძნობს. ჩვენ ექიმებთან ვისაუბრეთ, თუ როგორ შეიძლება სახელმწიფო პროგრამებით მსგავსი ოპერაციების დაფინანსება. აჭარის მთავრობა პაციენტს 15 000 ლარს გამოუყოფს მთავრობის თავმჯდომარის სარეზერვო ფონდიდან, ამდენივეს პაციენტი გადაიხდის, დარჩენილ 50 000 ლარს რეფერალური საავადმყოფო დაფარავს." - განაცხადა არჩილ ხაბაძემ.
ციროზით დაავადებულ 32 წლის ქალბატონის გადარჩენის ერთადერთი გზა ღვიძლის გადანერგვა იყო, რომელსაც ღვიძლის ერთი ნაწილი 27 წლის ძმამ მისცა. ექიმების შეფასებით, პაციენტის სიცოცხლის საშუალო ხანგრძლივობა ტრანსპლანტაციის გარეშე მხოლოდ 3-დან 6 თვემდე გასტანდა.
ამ დროისათვის, როგორც დონორის, ასევე რეციპიენტის ჯანმრთელობის მდგომარეობა განხორციელებული რთული ოპერაციის შესაბამისია. და-მის პოსტოპერაციული მართვა სამედიცინო პროტოკოლებითა და საერთაშორისო გაიდლაინების სრული დაცვით მიმდინარეობს. ძმა უკვე გაწერეს საავადმყოფოდან.
ღვიძლის ტრანსპლანტაციის პროექტისთვის მზადება „სამედიცინო კორპორაცია ევექსმა" წელიწადნახევრის წინ დაიწყო. ამ დროის განმავლობაში ქართველი ექიმები მსოფლიოს იმ ქვეყნებში გადამზადნენ, სადაც ღვიძლის ცოცხალი დონორიდან ტრანსპლანტაციები ყველაზე დიდი რაოდენობით კეთდება. ბათუმის რეფერალური ჰოსპიტალი აღიჭურვა ყველა იმ საჭირო სამედიცინო ინვენტარით, რომელიც ღვიძლის გადანერგვის ოპერაციისთვის არის საჭირო.
წარმატებით განხორცილებული გადანერგვა ღვიძლის ქრონიკული დაავადებებით გამოწვეულ სიკვდილიანობას მკვეთრად ამცირებს. საქართველოში იმ პაციენტების რიცხვი საგრძნობლად მაღალია, ვისაც აღნიშნული ოპერაცია ესაჭიროება.