სასწავლო კურსი ორასმა მეწარმემ გაიარა. სამეწარმეო უნარ-ჩვევების ამაღლების მიზნით მეწარმეებს ტრენინგ-კურსი შემდეგ მიმართულებებში ჩაუტარდათ: სტრატეგიული მენეჯმენტი, ბიუჯეტირება, დაგეგმვა და ანალიზი. ტრენინგში მონაწილეობდნენ როგორც მოქმედი, ისე დამწყები მეწარმეები.

ტრენინგები თბილისის მერიასა და „თიბისი ბანკს" შორის გაფორმებული ხელშეკრულების საფუძველზე ნოემბერსა და დეკემბერში ჩატარდა.

„მცირე და საშუალო ბიზნესის პროგრამის ხელშეწყობის ფარგლებში თბილისის მერიამ „თიბისი ბანკთან" მჭიდრო კომუნიკაციით ჩაატარა ტრენინგები მცირე და საშუალო მეწარმეებისთვის. ძალიან პრაქტიკული ტრენინგები იყო და ისინი კმაყოფილები არიან. ჩვენ აქტიურად ვაგრძელებთ მუშაობას ამ პროგრამის ფარგლებში, ისევე, როგორც სხვა მცირე და საშუალო ბიზნესის მხარდამჭერ პროგრამებსაც ვგეგმავთ, რათა მეტ მათგანს დავეხმაროთ და ეს ყველაეფრი აისახოს ქალაქისთვის სასიკეთო შედეგში", - განაცხადა დავით ნარმანიამ.

„თიბისი ბანკის" გენერალური დირექტორის, ვახტანგ ბუცხრიკიძის განცხადებით, „თიბისი ბანკისთვის" ყოველთვის მნიშვნელოვანი იყო და მომავალშიც იქნება მცირე და საშუალო ბიზნესის წახალისება.

„ბოლო წელიწადნახევარში სამი ათასმა მეწარმემ გაიარა ტრენინგი როგორც თბილისში ასევე ქუთაისში და ბათუმში. სასიხარულოა, რომ თბილისის მერია აქტიურად ჩაერთო ამ პროექტში ჩვენთან ერთად და დღეს გვყავს პირველი კურსდამთავრებულები, რომლებმაც ეს ტრენინგი გაიარეს. მჯერა, რომ თითოეული მათგანისათვის აქ მიღებული გამოცდილება იქნება საშუალება, რომ ისინი წარმატებულები გახდნენ. მომავალ წელს ვგეგმავთ ამ მიმართულებით მუშაობის გაფართოებას და მერიასთან აქტიურ თანამშრომლობას", - განაცხადა ვახტანგ ბუცხრიკიძემ.

თბილისის მერია მეწარმეობის მხარდამჭერი პროგრამის ფარგლებში სხვადასხვა ღონისძიებებს ახორციელებს. მათ შორისაა იაფი ფინანსური რესურსისადმი ხელმისაწვდომობა - 6 %-იანი სესხი მცირე და საშუალო ბიზნესის განვითარებისათვის. პროგრამის ერთ-ერთი მიმართულებაა ბიზნესსაქმიანობაში მეწარმეების უნარ-ჩვევების ამაღლება და მათი გადამზადება.

დედაქალაქის მერია მსგავსი პროექტების განხორციელებას მომავალ წელსაც გეგმავს.