28 დეკემბერს, თბილისის იუსტიციის სახლში ოლიმპიადის - „არასრულწლოვანთა დანაშაულის პრევენციის" გამარჯვებულების დაჯილდოების ცერემონია გაიმართა. ოლიმპიადაში საქართველოს იუსტიციის სამინისტროს სფეროში მოქმედი სსიპ „დანაშაულის პრევენციის ცენტრის" ახალგაზრდული პროგრამის „ლიდერთა სახლის" 20 აქტიური მოსწავლე მონაწილეობდა. გამარჯვებულებს „ბაზისბანკმა" პლანშეტები გადასცა. ოლიმპიადაში გაიმარჯვეს - გიგა ინაძემ, ლევან კერესელიძემ და ნანა კორბეშაშვილმა. „ბაზისბანკის" რჩეული კი გახდა დავით ბიბილეიშვილი. როგორც იუსტიციის სამინისტროს დანაშაულის პრევენციის ცენტრის დირექტორმა ჯონი კვინიკაძემ განაცხადა, ოლიმპიადაში მონაწილეობის უფლება ჰქონდათ პროგრამაში „ლიდერთა სახლი" ჩართულ ყველაზე აქტიურ მოსწავლეებს, რომლებიც დარეგისტრირდნენ აპლიკაციის მეშვეობით. მათ შესაბამისი განაცხადი შეავსეს და დაწერეს სამოტივაციო წერილიც, რომლის მიხედვითაც შეირჩა 20 საუკეთესო მოსწავლე. პროექტში ჩართული ახალგაზრდები ერთი კვირის განმავლობაში დაესწრნენ ხუთ ლექციას. ლექციების ძირითადი თემატიკა იყო დანაშაულის პრევენცია. „ტრენინგების გავლის შემდეგ მოსწავლეებმა ინდივიდუალურად მოამზადეს საკუთარი ნაშრომები და წარადგინეს კომპეტენტური ჟიურის წინაშე. ნაშრომებისა და მათი წარდგენის შედეგად მიღებული ქულების დაჯამებით გამოვლინდნენ გამარჯვებულები. მთელი ამ პროცესის და ზოგადად, ოლიმპიადის მიზანი იყო ახალგაზრდებში დანაშაულის პრევენციის შესახებ ცნობიერების ამაღლება", განაცხადა დანაშაულის პრევენციის ცენტრის დირექტორმა ჯონი კვინიკაძემ, რომელმაც ოლიმპიადის გამარჯვებულებს კარგი ნაშრომებისთვის მადლობა გადაუხადა და წარმატებები უსურვა. ოლიმპიადის ყველა მონაწილესთვის გამომცემლობამ „ბაკურ სულაკაურმა" და წიგნების მაღაზიამ „იურისტების სამყარომ" იურიდიული შინაარსის ლიტერატურა გამოყო. როგორც „ბაზისბანკის" საზოგადოებასთან ურთიერთობის განყოფილების უფროსმა თამარ ხადურმა განაცხადა, განათლების ხელშეწყობა და ახალ თაობაში სამოქალაქო-იურიდიული ცნობიერების ამაღლება კომპანიისთვის ერთ-ერთი პრიორიტეტული მიმართულებებია. „სახელმწიფოსა და ბიზნესის ერთობლივი ძალისხმევითა და სოციალური პასუხისმგებლობის გაზრდით შესაძლებელია ერუდირებული ახალი თაობის ჩამოყალიბება. „ბაზისბანკი" 6 წელია საგანმანათლებლო მიმართულების აქტიური მხარდამჭერია", განაცხადა თამარ ხადურმა. დაჯილდოების ცერემონიას დაესწრო „ბაზისბანკის" დირექტორი ლევან გარდაფხაძე.
მასალის გამოყენების პირობები
