დღეს, 24 დეკემბერს, ოცდაათწლიანი პაუზის შემდეგ ბათუმის პორტიდან პირველი საკრუიზო ხომალდი „IZABELA I" გავა. ახალი ტურისტული პაკეტის პრეზენტაცია დღეს გემის საკონფერენციო დარბაზში გაიმართა, რომელსაც აჭარის მთავრობის თავმჯდომარე არჩილ ხაბაძე, უმაღლესი საბჭოს თავმჯდომარე ავთანდილ ბერიძე და ქალაქის მერი გიორგი ერმაკოვი მთავრობის წევრებთან ერთად დაესწრნენ.
„დღეს მართლაც მნიშვნელოვანი დღეა ჩვენი ქალაქისთვის. ყველამ იცით, რომ ტურიზმი ყველაზე პრიორიტეტული სფეროა ჩვენი რეგიონისთვის. მით უფრო საზღვაო ტურიზმი. ვფიქრობ და თან ძალიან მინდა, რომ ჩემი რეგიონის მცხოვრებლებმაც მოახერხოს ჩვენი ქალაქის პორტიდან საზღვაო მოგზაურობის დაწყება. დარწმუნებული ვარ ბათუმელებისთვის და საერთოდ საქართველოს მოქალაქეებისთვის დღევანდელი დღე დიდი ხნის სურვილების ასრულების დასაწყისად იქცევა. ზღვისპირა ქალაქში, სადაც საზღვაო აკადემიაა, სადაც ამდენი მეზღვაური სწავლობს და კვალიფიციურ ცოდნას იღებს, ეს ფაქტი კიდევ უფრო დიდი სტიმულის მომცემი გახხდება. მადლობას ვუხდი კომპანიას და მის უცხოელ პარტნიორებს, რომელთა ძალისხმევითაც 30 წლიანი პაუზის შემდეგ აჭარიდან გავა სამოგზაურო ლაინერი, რომელიც ერთკვირიან კრუიზს ბათუმის პორტში დაიწყებს და დაასრულებს „ - განუცხადა არჩილ ხაბაძემ მიღებაზე მყოფ საზოგადოებას.
მიღებაზე რეგიონში აკრედიტებული დიპლომატიური კორპუსისა და ტურისტული კომპანიების წარმომადგენლებიც იმყოფებოდნენ. გემი 1000 მგაზვრის გადაყვანს შეძლებს. "Isabella 1"-ზე კაზინო, კაფე-ბარები, რესტორნები,საკონცერტო დარბაზი და დუტი ფრის მაღაზია ფუნქციონირებს. გემო კომპანია Paradise Cruise & Ferry-ს ეკუთვნის, რომლის ექსკლუზიური წარმომადგენელია ტურისტული კომპანია "ჯემინი". ლაინერი მარშრუტით ბათუმი-სოჭი-სტამბული , 2015 წლის 18 იანვრამდე გადაადგილდება.