დღეს, 23 დეკემბერს თბილისის მერიის, ევრაზიის თანამშრომლობის ფონდის და საქართველოს სტრატეგიული კვლევებისა და განვითარების ცენტრის ორგანიზებით, სასტუმრო "რედისონ ბლუ ივერიაში" სოციალური საწარმოების მესამე ყოველწლიური კონფერენცია გაიმართება. კონფერენცია 10:30 საათზე დაიწყება და მას თბილისის მერი დავით ნარმანია 15:30 საათზე შეუერთდება.
ფორუმში მონაწილეობას მიიღებენ თბილისის მერიის, სოციალური საწარმოების, არასამთავრობო ორგანიზაციებისა და ბიზნესსექტორის წარმომადგენლები.
შეხვედრა უკვე მესამე წელია იმართება და წელს მისი მთავარი თემა სამოქალაქო, საჯარო და კერძო სექტორებს შორის თანამშრომლობაა. ღონისძიების მიზანია სოციალური მეწარმეობის, როგორც სოციალური მიზნების მქონე ბიზნეს-მოდელის, განვითარება და ხელშეწყობა.
სოციალური მეწარმეობის განვითარების საკითხებზე მომუშავე ორგანიზაციები და სოციალური მეწარმეები 2014 წლის განმავლობაში განხორციელებული საქმიანობის შედეგებსა და მიღწევებს შეაჯამებენ და სამომავლო გეგმებსა და პრიორიტეტებზე ისაუბრებენ.
კონფერენციის მონაწილეები სოციალური მეწარმეობის შესახებ კანონპროექტსაც განიხილავენ, რომლის კონცეფციაც 2014 წელს შემუშავდა.
ღონისძიების მეორე ნაწილს გახსნის თბილისის მერი დავით ნარმანია, რომელიც ისაუბრებს სექტორებს შორის თანამშრომლობასა და მის მნიშვნელობაზე, თანამშრომლობის შესაძლო სფეროებზე და მექანიზმებზე. მოხსენების შემდეგ გაიმართება დისკუსია.
შეხვედრის ერთი პანელი გამოფენას დაეთმობა, სადაც მოწვეულ სტუმრებს შეეძლებათ, გაეცნონ საქართველოში მოქმედი სოციალური საწარმოების საქმიანობას, მათ პროდუქტებსა და სერვისებს.