სომხეთის სამართლებრივი რეგულირების ცენტრის წარმომადგენლები იურიდიული პირებისა და ქონების რეგისტრაციის პროცედურების გამარტივება-ლიბერალიზაციასთან დაკავშირებით ქართულ გამოცდილებას ეცნობიან. შეხვედრა სომხურ დელეგაციასა და საჯარო რეესტრის ეროვნული სააგენტოს წარმომადგენლებს შორის დღეს გაიმართა.
შეხვედრაზე საქართველოს საკანონმდებლო რეფორმებთან ერთად ელექტრონული რეგისტრაციის, უძრავი ქონების ობიექტებისთვის მისამართის მინიჭებისა და რეგისტრაციის პროცესში ნოტარიუსის როლთან დაკავშირებული საკითხებიც განიხილეს.
2011 წლიდან სომხეთის სამართლებრივი რეგულირების ეროვნული ცენტრის ფარგლებში „მარეგულირებელი გილიოტინის პროექტი" მიმდინარეობს. პროექტის მიზნებს ბიზნესის წარმოების კუთხით რეფორმის გატარება, სახელმწიფო სერვისების ხარჯების შემცირება და ბიზნესის გარემოს გაუმჯობესება წარმოადგენს. მასში სომხეთის ყველა სამინისტრო და მარეგულირებელი ორგანოა ჩართული. მულტი დონორული კონსორციუმი კი პროექტის ფარგლებში მიმდინარე რეფორმას ეხმარება.
რეფორმის წარმატებით განხორციელების მიზნით, სომხურ მხარეს ქართული პრაქტიკის გაზიარება და საქართველოს იუსტიციის სამინისტროსთან თანამშრომლობა სურს. ქართული მოდელის შესწავლა სომეხ სპეციალისტებს ქმედითი რეფორმების განხორციელების საშუალებას მისცემს.
