საჯარო რეესტრის ეროვნული სააგენტოს თავმჯდომარე პაპუნა უგრეხელიძე ესტონეთის რეესტრებისა და ინფორმაციული სისტემების ცენტრის (RIK) გამოცდილებას ეცნობა. სამუშაო ვიზიტი მიზნად ისახავს იურიდიული პირების ეკონომიკური საქმიანობების რეგისტრაციასთან დაკავშირებით ესტონური გამოცდილების გაცნობას და საუკეთესო პრაქტიკის გაზიარებას. ამავდროულად დაგეგმილია კონსულტაციები სისტემის დანერგვასა და ინსტიტუციურ მოწყობასთან, მის ფუნქციონიერებასა და საკანონმდებლო საფუძვლებთან დაკავშირებით.
„აღსანიშნავია, რომ ესტონეთში ეკონომიკური საქმიანობების რეგისტრაციასთან დაკავშირებულ ინიციატივებზე მუშაობა უკვე დასრულდა. მსგავსი ცვლილებების განხორციელება საქართველოშიც იგეგმება, ამიტომ ესტონური გამოცდილების გაზიარება ჩვენთვის ძალიან მნიშვნელოვანია. დაგეგმილი ცვლილებები ხელს შეუწყობს რეგისტრირებული მეწარმეებისა და სხვა სამართალსუბიექტების საქმიანობის შესახებ ზუსტი და სრულყოფილი მონაცემების მოპოვებას, შეიქმნება ბაზრის კვლევის ეფექტური მექანიზმი, რაც ხელს შეუწყობს საინვესტიციო გარემოს განვითარებასა და ბიზნესის საქმიანობის ხარისხის გაუმჯობესებას" - აცხადებს საჯარო რეესტრის ეროვნული სააგენტოს თავმჯდომარე პაპუნა უგრეხელიძე.
როგორც ცნობილია, საქართველოს მოქმედი კანონმდებლობა სუბიექტების საქმიანობათა ტიპებისა და საგნის რეგისტრაციის ვალდებულებას არ ითვალისწინებს. გამონაკლისს წარმოადგენს კვების პროდუქტებთან და მცენარეთა დაცვის საკითხებთან დაკავშირებული საქმიანობა, რომელიც მიუხედავად იმისა, რომ რეგისტრაციას ექვემდებარება, მექანიზმების სრულყოფასა და შემდგომ განვითარებას საჭიროებს.
აღსანიშნავია, რომ ეს საკითხი მჭიდრო კავშირშია საქართველოსა და ევროკავშირს შორის ასოცირების შეთანხმების შესაბამისად ნაკისრ ვალდებულებასთან, რომლის მიხედვით, უნდა შემუშავდეს ეკონომიკური საქმიანობების ეროვნული ნომენკლატურა, რომელიც ევროკავშირის ეკონომიკური საქმიანობების სტატისტიკური კლასიფიკაციის (NACE) შესაბამისი იქნება.
აღნიშნავია, რომ ეკონომიკური საქმიანობის სეგმენტაციის სტრატეგიის შექმნა მსოფლიო ბანკის ერთ-ერთი რეკომენდაციაცაა.
საბოლოო ჯამში, ქვეყანაში საქმიანობის ერთიანი რეესტრის ფორმირება საჭირო მონაცემებით უზრუნველყოფს, როგორც სახელმწიფო მმართველობის სისტემის ორგანოებს, ასევე, კერძო სექტორსა თუ ნებისმიერ დაინტერესებულ პირს, რაც ხელს შეუწყობს ეკონომიკური საქმიანობის ბაზრის კვლევას, ეფექტური პოლიტიკის დაგეგმვასა და ქვეყანაში უტყუარი ბიზნესკომპანიების საქმიანობის შესახებ სტატისტიკის წარმოებას.
