კონფერენცია დღეს საქართველოს იუსტიციის მინისტრის მოადგილემ მიხეილ სარჯველაძემ გახსნა: „ქართული სახელმწიფოს ისტორიული სწრაფვა - გახდეს ევროპული ოჯახის სრულფასოვანი წევრი, ევროპულ სტანდარტებთან სხვადასხვა სფეროს თუ დარგის ინტეგრაციასა და თავსებადობას გულისხმობს. მათ შორისაა, გეოგრაფიული მონაცემების სფეროც. საქართველოს მთავრობამ, ევროკავშირის წევრი სახელმწიფოების მსგავსად, გადაწყვიტა, შექმნას და განავითაროს ეროვნული სივრცითი მონაცემების ინფრასტრუქტურა, რათა ხელი შეუწყოს და გააუმჯობესოს გეოგრაფიულ მონაცემებზე წვდომა",-აღნიშნა მან.

ორი დღის განმავლობაში NSDI-ის განხოციელებაში ჩართული უწყებები წარადგენენ პრეზენტაციებს, რომლებიც სხვადასხვა კომპონენტს, მათ შორის, სამართლებრივ რეგულაციებს, გეოგრაფიულ მონაცემებს, საინფორმაციო ტექნოლოგიებს, ბიზნეს მოდელსა და საზოგადოებასთან ურთიერთობის საკითხებს მოიცავს. ამას გარდა, კონფერენციაზე წარმოდგენილია თითოეული სამინისტროს კონცეპტუალური ხედვა NSDI-ს განვითარებასთან დაკავშირებით.

სამთავრობო კომისიის საქმიანობას, რომელიც NSDI-ის შექმნისა და განვითარების მიზნით ჩამოყალიბდა, კოორდინაციას იუსტიციის სამინისტროს საჯარო რეესტრის ეროვნული სააგენტო უწევს. სააგენტოს თავმჯდომარის პაპუნა უგრეხელიძის განცხადებით, NSDI-ს დახმარებით კიდევ უფრო მარტივი და ეფექტური გახდება გარემოსდაცვითი საკითხების, კატასტროფების, სოფლის მეურნეობის, თავდაცვის, ინფრასტრუქტურული და სხვა სახის პროექტების მართვა და ფუნქციონირება: „იმ მონაცემებზე წვდომა, რომელიც დღეს ბაზარს ესაჭიროება, ხშირ შემთხვევაში რთულია, რაც იმას ნიშნავს, რომ მათი შესაძლებლობის ეფექტიანად გამოყენება არ ხდება. სწორედ ამის შეცვლას ვცდილობთ ეროვნული სივრცითი მონაცემების ინფრასტრუქტურის შექმნითა და განვითარებით. ჩვენი მიზანია, საქართველოში არსებული გეოგრაფიული მონაცემებიდან მიღებული საზოგადოებრივი სარგებელი მაქსიმუმამდე გაიზარდოს",-აღნიშნა მან.

საქართველო პირველი ქვეყანაა კავკასიის რეგიონში, რომელმაც ევროპულ სტანდარტებთან თავსებადი ეროვნული სივრცითი მონაცემების ინფრასტრუქტურის შექმნაზე მუშაობა დაიწყო, რაც ქვეყნის ევროკავშირთან ინტეგრაციის პროცესისკენ გადადგმული კიდევ ერთი ნაბიჯია.