ნატოს სპეციალური წარმომადგენელი კავკასიასა და ცენტრალურ აზიაში ჯეიმს აპატურაი საქართველოშია, რომელმაც კიდევ ერთხელ დაგმო რუსეთსა და დე ფაქტო აფხაზეთს შორის გაფორმებული ე.წ. ხელშეკრულება
„მავთლუხლართებისგან განსხვავებით, ეს არის ეკონომიური ინტეგრაცია და სოციალურ საკითხებსაც ითვალისწინებს. ჩემმა ქართველმა კოლეგებმა ამ პროცესს მცოცავი ანექსია უწოდეს და ჩვენ გავიზიარეთ მათი აზრი,"- განცხადა ჯეიმს აპატურაიმ თბილისის საერთაშორისო აეროპორტში.
აპატურაიმ ჟურნალისტებთან საუბრისას ასევე განაცხადა, რომ ძალიან კარგი შეხვედრა ჰქონდა საგარეო საქმეთა მინისტრთან ბრიუსელში და თამარ ბერუჩაშვილმა "იცის თავისი საქმე".
„ეს ძალიან კარგი დასაწყისია. გენერალური მდივნის მოადგილე და მე საქართველოში უახლოეს ხანებში ვგეგმავთ ჩამოსვლას, რათა მოვემზადოთ თავდაცვის მინისტრების შეხვედრისთვის თებერვალში. გვინდა, რომ მივაღწიოთ პროგრესს. აქ სწორედ იმისთვის ჩამოვედი, რომ განვიხილო ეს ყველაფერი. ვიზიტის ფარგლებში ვაპირებ ვისაუბრო პოლიტიკურ ვითარებაზე. გენერალურმა მდივანმა გამოხატა უკიდურესი შეშფოთება რუსეთსა და აფხაზეთს შორის გაფორმებულ ხელშეკრულებასთან დაკავშრებით. ვიცი, რომ არსებობს შეშფოთების საფუძველი სამხრეთ ოსეთთან მიმართებაშიც. მთლიანობაში კი ჩვენი პარტნიორობა ძალიან წარმატებულია. საქართველოს აქვს პროგრესი გაწევრიანების გზაზე და მიღებული პაკეტი ამის მნიშვნელოვან ნაწილს წარმოადგენს," - აღნიშნა ჯეიმს აპატურაიმ.
პირველი შეხვედრა ჯეიმს აპატურაის დღეს დილით თავდაცვის სამინისტროში აქვს დაგეგმილი. დღესვე აპატურაი შეხვდება საქართველოს პარლამენტის თავმჯდომარეს. ვიზიტის დროს ნატო-ს მაღალჩინოსანი შეხვდება ქვეყნის პრემიერს, ასევე უმრავლესობისა და უმცირესობის წარმომადგენლებს.