9-10 დეკემბერს საქართველოს ტექნიკური უნივერსიტეტი უმასპინძლებს რიგით მეხუთე საკოორდინაციო შეხვედრას, რომელიც გაიმართება ტემპუსის ENGITEC პროექტის (530244-TEMPUS-1-2012-1-SE-TEMPUS-JPCR) ფარგლებში.
პროექტი ENGITEC _ "უმაღლესი საინჟინრო განათლების მოდერნიზაცია საქართველოში, უკრაინასა და უზბეკეთში ტექნოლოგიური გამოწვევების საპასუხოდ" _ ითვალისწინებს უმაღლესი საინჟინრო-საგანმანათლებლო დაწესებულებების შესაძლებლობების გაძლიერებას იმისათვის, რომ მოხდეს სტუდენტების აღჭურვა კომპლექსური ტექნოლოგიების შექმნისა და ფუნქციონირებისათვის საჭირო კვალიფიკაციით თანამედროვე, გუნდურ მუშაობაზე დაფუძნებულ გარემოში. პროექტის კოორდინატორია შვედეთის სამეფო უნივერსიტეტი. პროექტის ხანგრძლივობა 3 წელია, 2012-2015 წწ.
პროექტის ძირითადი მიზნებია: პარტნიორი ქვეყნების _ საქართველოს, უკრაინისა და უზბეკეთის _ საინჟინრო უნივერსიტეტების შესაძლებლობის გაძლიერება და მომზადება წამყვანი ევროპული სასწავლო მეთოდოლოგიის დანერგვისთვის; სამაგისტრო და სადოქტორო პროგრამების მოდერნიზაცია ახალი ინტერდისციპლინარული მოდულების დანერგვით; "აკადემიური საზოგადოება _ მრეწველობა" დიალოგის ახალი პლატფორმის შექმნა უმაღლესი საინჟინრო განათლებისთვის, არსებული ტექნოლოგიური გამოწვევების შესაბამისად.
სტუ-ში გამართულ სამუშაო შეხვედრებზე განხილული იქნება პროექტის სამუშაო გეგმის მიხედვით კონსორციუმის წევრი უნივერსიტეტების მიერ განხორციელებული აქტივობები და მიღწეული შედეგები მოცემული ეტაპისთვის.
