3 დეკემბერი შეზღუდული შესაძლებლობების მქონე პირთა უფლებების დაცვის საერთაშორისო დღეა, რომელიც 1992 წელს გაერთიანებული ერების ორგანიზაციის ინიციატივით დაწესდა.
ჯანდაცვის მსოფლიო ორგანიზაციის მონაცემებით, მსოფლიოს მოსახლეობის 15% ანუ 1 მილიარდი ადამიანი უნარშეზღუდულია.მოსახლეობის დაბერებასთან და ქრონიკული დაავადებების გავრცელებასთან ერთად, ინვალიდობის მაჩვენებელი მატულობს. საქართველოში არაოფიციალური სტატისტიკით, 150 000 შეზღუდული შესაძლებლობის მქონე მოქალაქე ცხოვრობს. მათ, ყოველდღიურ ცხოვრებაში სხვა და სხვა მიზეზის გამო, უამრავი პრობლემა ექმნებათ. მათ დაბრკოლებას სხვა მიზეზებთან ერთად, შესაბამისი კანონმდებლობის არქონა, არაადაპტირებული გარემო და შეზღუდული შესაძლებლობის მქონე პირთა შესაძლებლობების მიმართ, საზოგადოების არაჯანსაღი დამოკიდებულება უქმნით.
შშმ პირთა საერთაშორისო დღის აღნიშვნა მიზნად ისახავს ინვალიდობის საკითხების შესახებ ცნობიერების ამაღლების ხელშეწყობას.
ჯანდაცვის მსოფლიო ორგანიზაციის რეკომენდაციით სახელმწიფოებმა უნარშეზღუდულ პირთა ცხოვრების გაუმჯობესების მიზნით უნდა განახორციელონ შემდეგი ქმედებები:
• უზრუნველყონ ძირითადი მომსახურების ხელმისაწვდომობა;
• განახორციელონ უნარშეზღუდულ პირთა სპეციალური პროგრამების ინვესტირება;
• მიიღონ ეროვნული სტრატეგია და სამოქმედო გეგმა;
• გააუმჯობესონ პერსონალის განათლების დონე, უზრუნველყონ სპეციალიზირებული პერსონალის მომზადება და მათი მიღება სამუშაო ადგილზე;
• უზრუნველყონ სათანადო დაფინანსება;
• აამაღლონ საზოგადოების ინფორმირებულობის დონე ინვალიდობის საკითხებთან დაკავშირებით;
• გააძლიერონ მუშაობა სამეცნიერო კვლევების და მონაცემთა შეგროვების კუთხით;
• მოახდინონ შეზღუდული შესაძლებლობების პირთა ჩართვა პოლიტიკისა და პროგრამების განხორციელების პროცესში.