ომბუდსმენების საერთაშორისო ინსტიტუტის (IOI) გენერალური მდივნის ოფიციალური შეტყობინებით, საქართველოს სახალხო დამცველი აღნიშნული ინსტიტუტის წევრი გახდა, ხმის მიცემის უფლებით. გადაწყვეტილება ომბუდსმენების საერთაშორისო ინსტიტუტის დირექტორთა საბჭომ საქართველოს სახალხო დამცველის გაწევრიანების შესახებ ოფიციალური მიმართვის განხილვის შედეგად მიიღო.როგორც ,,ჯი-ეიჩ-ენს" სახალხო დამცველის აპარატიდან აცნობეს მიმართვა მოიცავდა ამომწურავ ინფორმაციას საქართველოს სახალხო დამცველის მანდატის, დამოუკიდებლობის გარანტიების, სტრუქტურისა და საქმიანობის შესახებ.
ომბუდსმენთა საერთაშორისო ინსტიტუტის წევრობა მნიშვნელოვნად შეუწყობს ხელს საქართველოს სახალხო დამცველის აპარატის შესაძლებლობათა შემდგომ გაძლიერებას, საერთაშორისო ასპარეზზე თანამშრომლობის გაღრმავებას, რაც თავის მხრივ უზრუნველყოფს ეროვნულ დონეზე საუკეთესო გამოცდილების დანერგვას ადამიანის უფლებათა ეფექტური დაცვის მიზნით.
ომბუდსმენთა საერთაშორისო ინსტიტუტი (IOI) დაარსდა 1978 წელს და წარმოადგენს ერთადერთ გლობალურ ინსტიტუტს, რომელიც 155-მდე ომბუდსმენთა ორგანიზაციას აერთიანებს. ომბუდსმენთა საერთაშორისო ინსტიტუტი ხელს უწყობს ინფორმაციის გაცვლას რეგიონულ და უნივერსალურ დონეზე სხვადასხვა კონფერენციების, სწავლებებისა და სემინარების ორგანიზების მეშვეობით, ეფექტური საჯარო მმართველობის ჩამოყალიბებასა და წევრ ქვეყნებში დემოკრატიული სახელმწიფოს პრინციპების განმტკიცებას.
