საქართველოს პრეზიდენტის მრჩეველი სოფიო შამანიდი ყოფილ საგარეო საქმეთა მინისტრს სალომე ზურაბიშვილს შეხვდა.
როგორც ,,ჯი-ეიჩ-ენს'' პრეზიდენტის ადმინისტრაციიდან აცნობეს, შეხვედრისას საზღვარგარეთ მცხოვრები ქართველობის მოქალაქეობის საკითხები განიხილეს.
სალომე ზურაბიშვილს მიაჩნია, რომ სხვა ქვეყნის მოქალაქეობა არ არის მიზეზი იმისა, რომ ადამიანს ავტომატურად გაუუქმდეს თავისი ქვეყნის (საქართველოს) მოქალაქეობა, თუ ეს რომელიმე სხვა ქვეყნის კანონმდებლობით არ იზღუდება.
შეხვედრაზე ასევე აღინიშნა, რომ ქვეყანას არ ჰყავს დასაკარგი მოქალაქეები და იმ მოქალაქეებს, რომლებიც ამჟამად უცხოეთში ცხოვრობენ, მათი ეროვნული, ეთნიკური, რელიგიური თუ სხვა კუთვნილების მიუხედავად, უნდა აღუდგეთ საქართველოს მოქალაქეობა.
