IDFI თბილისის საკრებულოს წევრებსა და აპარატის თანამშრომლებზე გაცემული პრემიების შესახებ ინფორმაციას აქვეყნებს, რომლის მიხედვით, 2013 წლის 1 ნოემბერიდან - 2014 წლის ივნისის ჩათვლით, თბილისის საკრებულოს წევრებზე 1 247 206 ლარის პრემია გაიცა, რაც თითქმის სამჯერ მეტია 2013 წლის საწყისი 10 თვის განმავლობაში საკრებულოს წევრებზე გაცემული პრემიების ოდენობაზე.
ინფორმაციის თავისუფლების განვითარების ინსტიტუტის მონაცემებით, 2013 წლის ნოემბრიდან - 2014 წლის ივნისის თვის ჩათვლით, საკრებულოს მაშინდელ თავმჯდომარეს ირაკლი შიხიაშვილს პრემიის სახით, მიღებული აქვს 54 516 ლარი, გიორგი მუსხელიშვილს - 45 430 ლარი, გიორგი ტყემალაძეს და ჯაბა სამუშიას - თითოეულს 43 890 ლარი. ხოლო, სხვა საკრებულოს წევრების მიერ მიღებული პრემიების ოდენობა, უმრავლეს შემთხვევაში, არ ჩამოუვარდება 40 000 ლარს.
როგორც ორგანიზაციაში აღნიშნავენ, მიუხედავად იმისა, რომ 2014 წლის ივნისის შემდგომ ახალი საკრებულოს მოწვევის პირობებში საკრებულოს წევრებზე პრემიები აღარ გაიცემა, ხოლო აპარატის თანამშრომელთა წახალისების პრაქტიკაც მნიშვნელოვნად შემცირებულია, 2014 წლის საწყისი 6 თვის განმავლობაში, არაგეგმიურად გაცემული მაღალი ოდენობის პრემიებმა, გამოიწვია თბილისის ბიუჯეტის პროექტით შრომის ანაზღაურებისათვის გათვალისწინებული თანხების მნიშვნელოვანი გაზრდა.
2014 წლის ნოემბრის მდგომარეობით, თბილისის საკრებულოს შრომის ანაზღაურების გეგმამ უკვე შეადგინა 8 338 000 ლარი.
ორგანიზაციაში აღნიშნავენ, რომ ზემოთ ჩვენს მიერ მოყვანილი მონაცემები კიდევ ერთხელ ცხადყოფს, თუ რამდენად მნიშვნელოვანია საჯარო მოხელეებზე პრემიების გაცემის სისტემის საკანონმდებლო დონეზე დარეგულირება.