საქართველოს მთავარი პროკურატურის ორგანიზებით, სასტუმრო „თბილისი მარიოტში" „ოჯახური დანაშაულის წინააღმდეგ ბრძოლის კვირეულის" შემაჯამებელი კონფერენცია ჩატარდა, სადაც იმ ერთკვირიანი მუშაობის შედეგების გაცნობა და შეფასება მოხდა, რომელსაც პროკურატურა სხვადასხვა რეგიონებში ახორციელებდა. გარდა ამისა, პროკურატურამ წარმოადგინა საკუთარი ხედვა ოჯახური დანაშაულის წინააღმდეგ ეფექტური ბრძოლის შესახებ. როგორც ,,ჯი-ეიჩ-ენს" საგარეო უწყებიდან აცნობეს კონფერენცია შესავალი სიტყვით საქართველოს მთავარმა პროკურორმა გიორგი ბადაშვილმა გახსნა:
„ეს არის პირველი შემთხვევა, როცა სახელმწიფო სტრუქტურები, არასამთავრობო და საერთაშორისო ორგანიზაციები, სამეცნიერო წრეები და კერძო სექტორი დანაშაულის წინააღმდეგ საბრძოლველად გაერთიანდნენ. პროკურატურა მზადაა ყველა მათგანთან სათანამშრომლოდ, რათა დაიგეგმოს ეფექტური ნაბიჯები აღნიშნულ გამოწვევასთან საბრძოლველად" - აღნიშნა გიორგი ბადაშვილმა და პროექტის მიმდინარეობისას გაწეული თანადგომისთვის ამერიკის შეერთებული შტატების ელჩს საქართველოში რიჩარდ ნორლანდს მადლობა გადაუხადა.
აშშ-ის საელჩო პროკურატურის ინიციატივაში აქტიურად იყო ჩართული და ღონისძიებების ორგანიზებაში მონაწილეობდა.
ოჯახური დანაშაული უკანასაკნელ პერიოდში საზოგადოებისთვის მნიშვნელოვან გამოწვევად იქცა. ამისათვის პროკურატურამ ორი მიმართულებით იმუშავა. პირველი - უფრო ეფექტური გახადა სამართალდამცავი ორგანოების მუშაობა, ხოლო მეორე -პრევენციული ღონისძიებების და საზოგადოებრივი ცნობიერების ამაღლებაზე იზრუნა, რა მიზნითაც შესწავლილი იქნა 3000- მდე ძალადობის ფაქტი, მოხდა საერთაშორისო პრაქტიკის გაზიარება. პრობლემების იდენტიფიცირებისა და ანალიზის შედეგად დაადგინა დანაშაულის გამომწვევი მიზეზები, მსხვერპლთა და მოძალადეთა მახასიათებლები და ა.შ., რის საფუძველზეც პროკურატურის მიერ დაისახა აღნიშნულ დანაშაულთან ბრძოლის ეფექტური გზები.
პარალელურად პროკურორები შეხვდნენ საზოგადოების სხვადასხვა სეგმენტს და მიაწოდეს ინფორმაცია ამ ტიპის დანაშაულის სამართლებრივი მხარეების შესახებ.
კონფერენციაზე გარდა მთავარი პროკურორისა, პროკურატურის სხვა წარმომადგენლებმაც ისაუბრეს და იმედი გამოთქვეს, რომ ოჯახში დანაშაულის წინააღმდეგ ბრძოლა მომავალშიც ეფექტურად გაგრძელდება.
„ოჯახში დანაშაულის წინააღმდეგ ბრძოლის კვირეულის" ფარგლებში პროკურატურამ მოსახლეობასთან საინფორმაციო სახის 42 შეხვედრა გამართა, რომელშიც მონაწილეობა 21-მა პროკურორმა და 2256-მა მოქალაქემ მიიღო.
