სახალხო დამცველი უჩა ნანუაშვილი მუსლიმი მესხების გადასახლებიდან 70 წლისადმი მიძღვნილ ღონისძიებას დაესწრო, რომელიც თბილისში საზოგადოება „ვათანის" ორგანიზებით გაიმართა.
სახალხო დამცველმა კონფერენციაზე სიტყვით გამოსვლისას ხაზი გაუსვა რეპატრიაციის პროცესის დაჩქარების აუცილებლობას და იმ პრობლემატიკის მოგვარებას, რომელიც სახელმწიფოს ვალდებულებაში შედის. უჩა ნანუაშვილმა რეპატრიანტების საკითხზე მომუშავე უწყებათაშორისი საბჭოს მუშაობაც განიხილა, რომელიც 2011 წელს შეიქმნა.
სახალხო დამცველმა დადებითად შეაფასა საქართველოს მთავრობის მიერ რეპატრიანტთა საქართველოში დაბრუნების შესახებ მიღებულ სახელმწიფო სტრატეგია, თუმცა აღნიშნა, რომ დოკუმენტის იმპლემენტაციისთვის აუცილებელია დროული სამოქმედო გეგმის შემუშავება.
„მიმაჩნია, რომ სამოქმედო გეგმის შემუშავებაში ჩართული უნდა იყვნენ თავად რეპატრიანტები და ის ორგანიზაციები ვისაც უშუალოდ ეხება ეს საკითხები. სახალხო დამცველი აკვირდება საქართველოს მიერ აღებული ვალდებულებების შესრულების პროცესს, რათა იყოს დაცული მუსლიმი მესხების ძირითადი უფლებები დაბრუნებისა და ადგილზე ინტეგრაციის პროცესში," - განაცხადა უჩა ნანუაშვილმა.
სახალხო დამცველის აპარატის ცნობით, სამხრეთ საქართველოდან მუსლიმი მესხები 1944 წელის 15 ნოემბერს გაასახლეს. 5 რაიონის 220 სოფლიდან მოსახლეობა შუა აზიის მიმართულებით გადაასახლეს. ცნობილია, რომ გადასახლებას ათასობით ადამიანი ემსხვერპლა, თუმცა გარდაცვლილთა ზუსტი სტატისტიკა ამ დრომდე არ არსებობს.