საგარეო საქმეთა მინისტრი თამარ ბერუჩაშვილი აცხადებს, რომ დეფაქტო აფხაზეთის შემდეგ მოსალოდნელია იყო, რომ სამხრეთ ოსეთიც გამოთქვამდა სურვილს რუსეთთან მოკავშირეობისა და სტრატეგიული პარტნიორობის ხელშეკრულების გაფორმების შესახებ. როგორც მთავრობის სხდომის შემდეგ ბერუჩაშვილმა განმარტა ასეთ ვითარებაში საქართველოს ბერკეტი საერთაშორისო თანამეგობრობის მხარდაჭერაა.
"ეს მოსალოდნელი იყო. მათ განცხადება გააკეთეს, რომ უფრო მეტი ინტეგრაცია ექნებოდათ. ჩვენი რესურსია საერთაშორისო თანამეგობრობის მხარდაჭერა. ეს არის ყველაზე მნიშვნელოვანი ბერკეტი. გუშინ ეუთო-ს მუდმივი საბჭოს სხდომაზე გამოვიდა ჩემი მოადგილე დავით დონდუა. იყო ძალიან სერიოზული მხარდაჭერა, როგორც აშშ-ის, ასევე ევროკავშირის მიერ, რომლებსაც შეუერთდა 11 ქვეყანა, ასევე ნორვეგია. ბაზელში მომავალ კვირას გაიმართება ეუთო-ს მინისტრთა შეკრება, ასევე არის ნატო-ს მინისტერიალი. ყველა ეს ფორმატი გამოყენებული იქნება და მიეძღვნება ამ თემას", - განაცხადა თამარ ბერუჩაშვილმა.
სამხრეთ ოსეთმა რუსეთთან მოკავშირეობისა და სტრატეგიული პარტნიორობის ხელშეკრულება შესაძლოა მომავალი წლის დასაწყისში გააფორმოს. ამის შესახებ, დეფაქტო რესპუბლიკის პარლამენტის სპიკერმა ანატოლი ბიბილოვმა განაცხადა. მისივე თქმით, დოკუმენტი უფრო მეტად ინტეგრაციული იქნება, ვიდრე რუსულ-აფხაზური ხელშეკრულება. "ჩვენ დაინტერესებულნი ვართ მაქსიმალური ინტეგრაციით არამხოლოდ უსაფრთხოების, არამედ სოციალურ საკითხებშიც, რადგანაც შეთანხმების რეალიზება სამხრეთ ოსეთის მცხოვრებლების სოციალურ პირობებზე, ხელფასებსა და პენსიებზეც უნდა აისახოს. ასევე, მთლიანად უნდა მოგვარდეს საბაჟო საკითხები,"-განაცხადა ბიბილოვმა.