თბილისის მერიისა და საკრებულოს დელეგაცია, დედაქალაქის მერის, დავით ნარმანიასა და საკრებულოს თავმჯდომარის, გიორგი ალიბეგაშვილის ხელმძღვანელობით, ჩინეთის სახალხო რესპუბლიკაში ვიზიტით იმყოფება. ვიზიტის პირველ დღეს დელეგაცია ქალაქ ქეითუნის მერს ხეილატ აშიკს, ქალაქის სხვა ოფიციალურ პირებსა და ადგილობრივი ბიზნესის წარმომადგენლებს შეხვდნენ. შეხვედრაზე ყურადღება გამახვილდა ორ ქალაქს შორის თანამშრომლობის გაძლიერებაზე ვაჭრობის, ტურიზმისა და ინვესტიციების განხორციელების მიმართულებით.
როგორც დედაქალაქის მერმა, დავით ნარმანიამ საკუთარ გამოსვლაში აღნიშნა, თბილისსა და ქეითუნს შორის ურთიერთობის გაღრმავებას პირდაპირი ავიარეისების არსებობაც შეუწყობს ხელს. მისი თქმით, მნიშვნელოვანი საინვესტიციო პროგრამების დაგეგმვა თბილისს არაერთი საკითხის გადაჭრის შესაძლებლობას მისცემს. მან, ასევე, ყურადღება გაამახვილა აბრეშუმის გზის განვითარებაზე, რაც ორ ქვეყანას და, შესაბამისად, ამ ქვეყნების ქალაქებს ვაჭრობისა და ტურიზმის სფეროში სერიოზული წარმატების შანსს აძლევს.
დღესვე დელეგაცია ქეითუნიდან გუანჯოუში გადაინაცვლებს, სადაც ბიზნეს-კონფერენცია და მერებს შორის შეხვედრა გაიმართება. დელეგაცია საქართველოში 1 დეკემბერს დაბრუნდება.
მასალის გამოყენების პირობები