ოკუპირებული აფხაზეთის ქალაქ გაგრაში, ერთ-ერთ ქუჩაზე, სასტუმრო ,,რაიდას" მიმდებარე ტერიტორიაზე წყალმომარაგების სისტემის რეკონსტრუქციისას უძველეს სამარხს გადააწყდნენ, სადაც პირველყოფილი ადამიანის ნაშთები აღმოაჩინეს.
ადგილის დასათვალიერებლად აფხაზეთის ჰუმანიტარული კვლევების ინსტიტუტის არქეოლოგები და ოკუპირებული აფხაზეთის კულტურის სამინისტრო ისტორიულ-კულტურული მემკვიდრეობის სამმართველოს წარმომადგენლები მივიდნენ.
აფხაზი მეცნიერ-არქეოლოგების ვარაუდით, აღმოჩენილი სამარხი გვიანი ბრინჯაოს ხანის წებელდურ კულტურას განეკუთვნება.
ჯერ-ჯერობით მხოლოდ ერთი უძველესი ადამიანის, სავარაუდოდ ქალის ნაწილებია აღმოჩენილი, ვინაიდან მასთან ერთად სამარხში ბრინჯაოს სამაჯურები და ჯვრისმაგვარი პლასტიკის ფურცელიც იპოვეს.
არქეოლოგები არ გამორიცხავენ, რომ გათხრებისას იქ დიდ სამარხს გადააწყდნენ, ვინაიდან ამ პერიოდის მახასიათებლებში ერთეული სამარხები ნაკლებად გვხვდება.
შეგახსენებთ, გაგრაში მსგავსი აღმოჩენა ადრეც გააკეთეს.
დიდი სამარხი გაგრის სახელმწიფო ისტორიულ-არქიტექტურული მუზეუმ-ნაკრძალის ზონაში მდებარე ციხესიმაგრის ჩრდილო-დასავლეთ საყრდენ კედელთან 2007 წლის დეკემბერში აღმოაჩინეს.