დეპუტატები დღეს, პარლამენტის პლენარულ სხდომაზე ფარული მიყურადების ე.წ. გასაღების საკითხზე მომზადებულ ორ კანონპროექტს უყრიან კენჭს.
იურიდიულ საკითხთა კომიტეტის სხდომაზე კენჭისყრის შედეგად, ორივე კანონპროექტზე დამსწრეთა ხმები თანაბრად გაიყო და შესაბამისად, პლენარულ სხდომაზე ორივე კანონპროექტი გადის.
კანონპროექტის დასამტკიცებლად საჭიროა, მას დამსწრეთა უმრავლესობამ მხარი დაუჭიროს.
პარლამენტში დარეგისტრირებული კანონის ერთ-ერთი პროექტის მიხედვით, რომლის ავტორები ეკა ბესელია, გედევან ფოფხაძე და ირაკლი სესიაშვილი არიან, პერსონალურ ინფორმაციაზე წვდომა პერსონალური მონაცემების დაცვის ინსპექტორს და შსს-ს ექნება, თუმცა მოსმენის ნებართვას ორივე შემთხვევაში სასამართლო გასცემს.
ე.წ. გასაღების საკითხზე კიდევ ერთი წინადადების მიხედვით, რომელიც პარლამენტის იურიდიულ საკითხთა კომიტეტის თავმჯდომარე ვახტანგ ხმალაძეს ეკუთვნის, პერსონალურ მონაცემებზე წვდომა კომუნიკაციების ეროვნულ კომისიას ექნება
ცნობილია, რომ საპარლამენტო ფრაქცია "თავისუფალი დემოკრატები" და ფრაქცია "ქართული ოცნება- რესპუბლიკელები" ფარულ მოსმენებთან დაკავშირებით, მხარს ვახტანგ ხმალაძის ვერსიას დაუჭერენ.
უმრავლესობის პროექტს კი, ემხრობა პრემიერ-მინისტრი და საპარლამენტო უმრავლესობის დანარჩენი ნაწილი.
არასამთავრობო ორგანიზაციები, რომლებიც პროცესში აქტიურად არიან ჩართული, ე.წ. "გასაღები"- ს შინაგან საქმეთა სამინისტროს ხელში დარჩენას ეწინააღმდეგებიან. მათი თქმით, ევროპელი ექსპერტების რეკომენდაციაში, სადაც ორგასაღებიანი მექანიზმის ამოქმედებაზე იყო საუბარი,აღნიშნულია, რომ პერსონალურ მონაცემებზე სამართალდამცავ ორგანოებს წვდომა არ უნდა ჰქონდეთ.
