,,გენდერული მგრძნობელობის განვითარება - ჯანსაღი აზროვნების დასამკვიდრებლად"-ასე ქვია პროექტს, რომლის განხორციელება ,, ქართულმა მედია-ჯგუფმა" (GMG) ,,კონფლიქტებისა და მოლაპარაკებების საერთაშორისო კვლევითი ცენტრის" (ICCN) მხარდაჭერით დაიწყო.
16 დღიანი კამპანიის ფარგლებში გორში დაგეგმილია ტრენინგ-სემინარები გენდერული თანასწორობის შესახებ, როგორც სუხიშვილის სახელობის და გორის სახელმწიფო უნივერსიტეტებში სტუდენტებთან, ასევე სკოლის მოსწავლეებთან. პროექტის ფარგლებში მოეწყობა ,,მრგვალი მაგიდაც", რომელსაც არასამთავრობო სექტორის, ხელისუფლების, მედიის წარმომადგენლები, ასევე ახალგაზრდები და ამ თემით დაინტერესებული სხვა პირები დაესწრებიან. შეხვედრაზე საზოგადოება განიხილავს ქალთა მიმართ დაფიქსირებულ ძალადობის ფაქტებს, მის გამომწვევ მიზეზებს და გამოსავლის გზებზეც იმსჯელებს.
პარალელურად ,,ქართული მედია-ჯგუფი" შეაგროვებს ხელმოწერებს მიმართვაზე, რომელიც განათლების სამინისტროს პროექტის დასასრულს გადაეგზავნება. მიმართვაში ხელმომწერები მოითხოვენ, რომ სასწავლო დაწესებულებებში ისწავლებოდეს გენდერის სპეციალური სახელმძღვანელო, ახალ თაობაში ჯანსაღი აზროვნების დამკვიდრების მიზნით.
პროექტი 25 ნოემბერს დაიწყო და 10 დეკემბერს დასრულდება. დახურვის ღონისძიებაზე პროექტის მონაწილეები საზოგადოებას ამ მიმართულებით მედია-მონიტორინგის შედეგებსაც გააცნობენ.