არასამთავრობო ორგანიზაციების ,,კონფლიქტებისა და მოლაპარაკებების საერთაშორისო კვლევითი ცენტრის (ICCN) და ,,მერსი ქორფსის" (MC) ურთიერთპარტნიორობის და USAID-ის ფინანსური მხარდაჭერით, ბორჯომის მუნიციპალიტეტის გამგეობის შენობაში,,ქალთა ოთახი" საზეიმოდ ბორჯომის მუნიციპალიტეტის გამგებელმა დიმიტრი ყიფიანმა გაიხსნა.

„ქალთა ოთახის" მთავარი ფუნქციაა მუნიციპალიტეტში მისული ქალის დახმარება და მისთვის კონსულტაციის გაწევა სხვადასხვა მუნიციპალური სერვისის შესახებ. დაინტერესებულ ადამიანს შეუძლია, სასურველი ინფორმაცია მიიღოს ქალთა ოთახში არსებული ბიბლიოთეკისა და ინტერნეტის გამოყენებით.
ოთახში ასევე მოწყობილია ბავშვთა კუთხე, რომელიც ქალს ხელს უწყობს, საჭირო ინფორმაციის მიღების პარალელურად უზრუნველყოს ბავშვის გართობაც. ამასთანავე, ქალთა ოთახი საშუალებას აძლევს, სხვადასხვა არასამთავრობო თუ კერძო სექტორის წარმომადგენლებს, გამოიყენონ არსებული სივრცე შეხვედრების მოსაწყობად, რაც თავის მხრივ, ქმნის დამატებით სარგებელს ქალთა ოთახის ვიზიტორებისთვის ინფორმაციისა და სხვადასხვა იდეების გაზიარების კუთხით.

„ქალთა ოთახის" გახსნას დაესწრნენ USAID-ის პროგრამის წარმომადგენლები, აგრეთვე, არასამთვრობო ორგანიზაციები, ადგილობრივი თვითმმართველობის წარმომადგენლები,ფონდები და სხვა დაინტერესებული მხარეები.

აღსანიშნავია, რომ პროგრამა დაიწყო 2014 წლის აპრილიდან და ხორციელდება ქვემო ქართლისა და სამცხე ჯავახეთის 13 მუნიციპალიტეტში.პროექტის ფარგლებში ეს რიგით მეორე ქალთა ოთახია .

პროგრამა დაფინანსებულია ამერიკის შეერთებული შტატების განვითარების სააგენტოს მიერ (USAID) და ხორციელდება კონფლიქტების და მოლაპარაკების საერთაშორისო კვლევითი ცენტრის (ICCN) მიერ, მერსი ქორფსთან (Mercy Corps) პარტნიორობით.