უზენაესი სასამართლოს თავმჯდომარე კონსტანტინე კუბლაშვილი მიიჩნევს, რომ ე.წ. მოსმენების შესახებ, არასამთავრობო ორგანიზაციების მიერ შეთავაზებული ინიციატივის განხორციელების შემთხვევაში, ინტერესთა აღრევა მოხდება.
მისივე თქმით, თუ პარლამენტი პროექტს დაუჭერს მხარს, სასამართლო კანონით გათვალისწინებულ ნორმებს შეასრულებს.
"ამ პროცესში სასამართლოს ჩართვა არ იქნება მიზანშეწონილი, რადგან სასამართლო თავად გასცემს ბრძანებას და გამოდის, რომ შემდეგ იგი ამ ბრძანების აღმსრულებელი უნდა გახდეს. ინფორმაციის ნაწილი, რომელიც იქნება მოპოვებული, უნდა გაანადგუროს, ნაწილი კი საქმის განხილვისას უნდა გამოიყენოს. ეს ნიშნავს, რომ ძალიან ბევრი ფუნქციის აღრევა მოხდება. თუ პარლამენტი მაინც გადაწყვეტს, რომ ამ პროექტს დაუჭიროს მხარი, რა თქმა უნდა, სასამართლო შეასრულებს კანონით სავალდებულო ნორმებს", - განაცხადა კუბლაშვილმა.
შეგახსენებთ, პარლამენტში დარეგისტრირებულია ორი კანონპროექტი. დეპუტატებს საკითხზე საბოლოო გადაწყვეტილების მისაღებად ვადა 1-ელ დეკემბრამდე აქვთ.
არასამთავრობო ორგანიზაციების შეთავაზება, რომლებიც პროცესში აქტიურად არიან ჩართული ითვალისწინებს, ე.წ. ორგასაღებიანი სისტემის ამოქმედებას, რომლის მიხედვითაც, ერთი გასაღები სასამართლოს, ხოლო მეორე ელექტრონულ კომპანიებს ექნებათ.
