სრულიად საქართველოს კათოლიკოს-პატრიარქმა უწმინდესმა და უნეტარესმა ილია II სამების საკათედრო ტაძარში საზეიმო წირვის დასრულების შემეგ მოსახლეობას გიორგობა მიულოცა და საქართველოს ხელისუფლება დალოცა.
,,ღმერთმა მოგცეთ ყველას ძალა. ღმერთმა მოგცეთ მშვიდობა, სიხარული, სიყვარული. ღმერთმა დალოცოს და გაამთლიანოს საქართველო. ღმერთმა დალოცოს ჩვენი ხელისუფლება და მისცეს მათ ერთსულოვნება, რათა ღირსეულად ემსახურონ ჩვენს სამშობლოს" - ბრძანა პატრიარქმა სამების ტაძარში ქადაგებისას.
უწმინდესმა ასევე რამდენიმე გვარი და სახელმწიფო დაცვის სპეციალური სამსახურიც დალოცა.
შეგახსენებთ, რომ საქართველოს მართლმადიდებელი ეკლესია 23 ნოემბერს წმინდა გიორგის ბორბალზე წამების დღეს აღნიშნავს.
წმინდა, საკვირველთმოქმედი და ძლევაშემოსილი გიორგი ქართველი ერის მფარველად მიიჩნევა.
წმინდა გიორგი 30 წლის ასაკში ეწამა. 303 წელს მას, რომის იმპერატორ დიოკლიტიანეს ბრძანებით, თავი მოკვეთეს. წმ. გიორგი მხედართმთავარი იყო და დიოკლიტიანეს ქრისტიანებზე დევნის გამო განუდგა. მან მრავალი სატანჯველი დაითმინა, მათ შორის - ბორბალზე გაკვრა.
