,,ოქროს ბიჭების'' საიუბილეო ღონისძიებები გრძელდება. 1964 წელს საბჭოთა კავშირის ჩემპიონი გუნდისა და ლეგენდარული მეკარის სერგო კოტრიკაძის მემრიალური დაფების გახსნის შემდეგ, დედაქალაქს ცნობილი თავდამსხმელის მიხეილ მესხის ძეგლიც შეემატა.
საზეიმო ღონისძიება მისივე სახელობის სტადიონზე გაიმართა.
ფეხბურთელების 50 წლის იუბილეზე შეკრებილ საზოგადოებას საკრებულოს თავმჯდომარემ მიმართა.
გიორგი ალიბეგაშვილმა მიხეილ მესხისა და „ოქროს ბიჭების" ღვაწლზე ისაუბრა და აღნიშნა, რომ თბილისის საკრებულო, რომელიც ამ ღონისძიებების ინიციატორი და ორგანიზატორია, თავის მხრივ ეცადა სათანადო და ღირსეული პატივი მიეგო ამ ადამიანებისათვის.
„ასეთი ღირსეული პიროვნებების დაფასება უპირველეს ყოვლისა ჩვენ და ჩვენს მომავალ თაობებს სჭირდებათ. ეს ეხება არა მხოლოდ სპორტს, არამედ ნებისმიერ სფეროს, რომელიც ქართველი ხალხის სულიერ, კულტურულ და ფიზიკურ ღირებულებებსა და შესაძლებლობებს წარმოაჩენს. ყოველივე ეს კეთდება ჩვენი მომავალი თაობებისათვის და ჩვენ კვლავაც ამ გზით სიარულს განვაგრძობთ, რათა ყოველთვის გვახსოვდეს, ვის მხრებზე ვდაგავრთ. დარწმუნებული ვარ ეს ღონისძიება შეახსენებს ჩვენს საზოგადოებას, რომ საქართველოს აქვს დიდი პერსპექტივა, გახდეს ფეხბურთის ქვეყანა"-აღნიშნა გიორგი ალიბეგაშვილმა.
მიხეილ მესხის ძეგლის გახსნას ოჯახის წევრებთან ერთად თბილისის მუნიციპალიტეტის საკრებულოს სპორტისა და ახალგაზრდულ საქმეთა კომისიის თავმჯდომარე, ქეთევან ჯოხაძე, თბილისის მერი, დავით ნარმანია, სპორტისა და ახალგზრდობის საქმეთა მინისტრი, ლევან ყიფიანი, ფეხბურთის ფედერაციის პრეზიდენტი, რევაზ არველაძე და მთავრობის სხვა წარმომადგენლებიც ესწრებოდნენ.