მიმდინარე წლის 19-21 ნოემბერს აზერბაიჯანის დედაქალაქ ბაქოში საერთაშორისო ანტიკორუფციული აკადემიის (IACA) ასამბლეის მესამე სესია გაიმართება. სესიას საქართველოს იუსტიციის მინისტრის პირველი მოადგილე ალექსანდრე ბარამიძე დაესწრება. ასამბლეაზე წარმოდგენილი იქნებიან როგორც საერთაშორისო ანტიკორუფციული აკადემიის წევრი ქვეყნები, ისე გაერო-ს წევრი სახელმწიფოების ხელისუფლების უმაღლესი რანგის მოწვეული სტუმრები (მინისტრები, მინისტრის მოადგილეები და ა. შ.).
აღნიშნული ღონისძიების ფარგლებში გაიმართება დისკუსიები, რომლებზეც ღონისძიების მაღალი რანგის წარმომადგენლებს შესაძლებლობა მიეცემათ, განსაზღვრონ კონფერენციის ძირითადი მიმართულებები. ზოგადი დისკუსიების ნაწილში იგეგმება, ასევე, ალექსანდრე ბარამიძის სიტყვით გამოსვლა.
„IACA"-ს 2011 წლიდან აქვს მინიჭებული საერთაშორისო ორგანიზაციის სტატუსი და ამ დროისთვის, დაახლოებით, 64 ქვეყანას აერთიანებს. ორგანიზაციის მიზანია, ხელი შეუწყოს კორუფციის წინააღმდეგ ბრძოლას, გახდეს ლიდერი საგანმანათლებლო ორგანიზაცია ანტიკორუფციული მიმართულებით და ამ კუთხით მოამზადოს პროფესიონალები და პრაქტიკოსები ყველა სექტორში.
შეხვედრის პირველი დღე დაიწყება არაფორმალური კონსულტაციებით, რეგიონულ ჯგუფებთან საკოორდინაციო შეხვედრებითა და აზერბაიჯანის პრეზიდენტის მისასალმებელი სიტყვით. დღის მეორე ნაწილში გათვალისწინებულია ორგანიზაციული საკითხების განხილვა, ოფიცრების არჩევა, დღის წესრიგის დამტკიცება, დამკვირვებლების მონაწილეობა და ბიუროს ანგარიშის დამტკიცება. პირველი დღე დასრულდება მაღალი რანგის წარმომადგენლების ზოგადი დისკუსიით.
20 ნოემბერს დღის წესრიგი მოიცავს ზოგად დისკუსიებს. განიხილება საერთაშორისო ანტიკორუფციული აკადემიის სამომავლო განვითარება: შეფასდება შესაბამისი ორგანოების ანგარიშები, დამტკიცდება სამუშაო გეგმა და 2015 წლის ბიუჯეტი; ასევე, განიხილება აკადემიისთვის ფონდების მოძიებისა და არსებული ვაკანსიების შევსების საკითხები.
21 ნოემბერს, სესიის ბოლო დღეს, შეფასდება სხვა დამატებითი საკითხები, ასამბლეის მეოთხე სესიის სავარაუდო დღის წესრიგი და დამტკიცდება ასამბლეის მესამე შეხვედრის ანგარიში.
