ადგილობრივი მუნიციპალიტეტების უფულოდ დატოვება თვითმმართველობის რეფორმის კრახს ნიშნავს, - აცხადებენ "ახალი მემარჯვენეები" და აღნიშნავენ, რომ 2015 წლის ბიუჯეტის პროექტის განხილვის პროცესში, არ ხდება ახალი მიდგომებით მუნიციპალიტეტებისთვის ტრანსფერების განსაზღვრა და საბიუჯეტო შემოსავლების გამიჯვნა, რომელიც 2014 წელს განხორციელებული თვითმმართველობის რეფორმის მიერ იყო გათვალისწინებული.
მათი შეფასებით, საქართველომ მიიღო კვლავ "გაღლეტილი", მხოლოდ ცენტრზე დამოკიდებული არამოტივირებული, უინიციატივო თვითმმართველობი.
"ეს კი ნიშნავს, რომ 71 მუნიციპალიტეტი კვლავ დარჩა უფულოდ, ეს ნიშნავს მოსახლეობისთვის მიცემული დაპირებების შეუსრულებლობას, მათ მოუგვარებელ პრობლემებს და განუხორციელებელ რეგიონულ პროექტებს. საქმე ისაა, რომ 2014 წელს საქართველოს პარლამენტმა მიიღო "ადგილობრივი თვითმმართველობის კოდექსი", რომელიც ხელისუფლების მხრიდან "რევოლუციურ" დოკუმენტად მოინათლა და რომელსაც უნდა უზრუნველეყო ქვეყანაში ადგილობრივი თვითმმართველობების ძირეული რეფორმა. საუბარია კოდექსის 154-ე მუხლზე, რომლის თანახმადაც საქართველოს მთავრობას ევალებოდა 2014 წლის 1 სექტემბრამდე საქართველოს პარლამენტისთვის წარედგინა საბიუჯეტო კოდექსში შესატანი ცვლილებების პროექტი, რომელიც განსაზღვრავდა საბიუჯეტო შემოსულობების გამიჯვნას საქართველოს სახელმწიფო, ავტონომიური რესპუბლიკების და მუნიციპალიტეტების ბიუჯეტებს შორის პროცენტული მაჩვენებლების მიხედვით. ამავე დროს, ამავე ვადაში უნდა განსაზღვრულიყო მუნიციპალიტეტებისათვის გამოსაყოფი გათანაბრებითი ტრანსფერის მთლიანი ფონდის პროცენტული მიმართება ნომინალურ მთლიან შიდა პროდუქტთან და გათანაბრებითი ტრანსფერის განაწილების შესაბამისი წესი. ეს იმას ნიშნავს, რომ ხელისუფლების მიერ ფართოდ გაპიარებულმა ე.წ." თვითმმართველობის რადიკალურმა რეფორმამ" კრახი განიცადა და რეალურად ვერ იქნა მიღწეული ყველაზე მთავარი - თვითმმართველობების ფინანსური დამოუკიდებლობა, რის გარეშეც საუბარიც კი ზედმეტია თვითმმართველობების მიერ საკუთარი ფუნქციების სრულფასოვნად შესრულებაზე", - აცხადებენ მემარჯვენეები.
მათი განცხადებით, თვითმმართველობების რეფორმისადმი ხელისუფლების დამოკიდებულება იმას ნიშნავს, რომ თვითმმართველობის მეორე უმნიშვნელოვანეს კომპონენტსაც - ცენტრალური და ადგილობრივი ქონების გამიჯვნას, რომელიც 2017 წლიდან არის გათვალისწინებული, დიდი ალბათობით, იგივე ბედი ელის, რაც ფინანსურ დამოუკიდებლობას.
"ასეთ სიტუაციაში არანაირი მნიშვნელობა არ აქვს პირდაპირი წესით არჩეული მერები და გამგებლები გვეყოლება თუ არა, რადგან მათ განსახორციელებელი და განსაკარგავი პრაქტიკულად არაფერი აქვთ. მივმართავთ საქართველოს პარლამენტის თავმჯდომარეს დავით უსუფაშვილს, საფინანსო-საბიუჯეტო და რეგიონული პოლიტიკისა და თვითმმართველობის კომიტეტების თავმჯდომარეებს დავით ონოფრიშვილს და ირაკლი ტრიპოლსკის, შეასრულონ კონსტიტუციით განსაზღვრული უფლებამოსილება და დაუყოვნებლივ უზრუნველყონ კანონით გათვალისწინებული მოთხოვნების შესასრულება. აუცილებელია, მომავალი 2015 წლის ბიუჯეტის დამტკიცებამდე უზრუნველყოფილ იქნას თვითმმართველობის კოდექსის 154-ე მუხლის შესარულება და თვითმმართველობების ფინანსური დამოუკიდებლობის რეალური განხორციელება საქართველოში", - აცხადებენ მემარჯვენეები..
