2014 წლის 17 ნოემბერს, 15 საათზე, სასტუმრო „ქორთიარდ მარიოტში", საქართველოს სახალხო დამცველი ტოლერანტობის საერთაშორისო დღისადმი მიძღვნილ ღონისძიებას უმასპინძლებს.
ღონისძიებას გახსნიან საქართველოს სახალხო დამცველი უჩა ნანუაშვილი და აშშ-ის საერთაშორისო განვითარების სააგენტოს მისიის ხელმძღვანელის მოვალეობის შემსრულებელი ტომას მორისი.
სახალხო დამცველთან არსებული ტოლერანტობის ცენტრის ხელმძღვანელი ბექა მინდიაშვილი მიმოიხილავს 2014 წლის განმავლობაში საქართველოში ტოლერანტობის სფეროში არსებულ მიღწევებსა და პრობლემებს; სახალხო დამცველთან არსებული ეროვნულ უმცირესობათა და რელიგიათა საბჭოები ტრადიციულად დააჯილდოებენ „ტოლერანტობის ქომაგებს" - იმ პიროვნებებს, ორგანიზაციებს, მედია საშუალებებს და საჯარო მოხელეებს რომლებმაც საქართველოში ტოლერანტობის კულტურის განვითარებაში შეიტანეს წვლილი, რის შემდეგაც გაიმართება მედიაკონკურსში „ტოლერანტობა და მრავალფეროვნება" გამარჯვებული ჟურნალისტების გამოვლენა და დაჯილდოება.
შეხვედრას საქართველოს სახელმწიფო უწყებების, დიპლომატიური მისიების, საერთაშორისო და არასამთავრობო ორგანიზაციების და რელიგიათა და ეთნიკურ უმცირესობათა საბჭოების წარმომადგენლები დაესწრებიან.
ღონისძიების ორგანიზატორია სახალხო დამცველთან არსებული ტოლერანტობის ცენტრი, აშშ-ს საერთაშორისო განვითარების სააგენტოს მიერ დაფინანსებული საქართველოს გაეროს ასოციაციის პროექტის „ეროვნული ინტეგრაციის გაძლიერება" მხარდაჭერით.
ტოლერანტობის საერთაშორისო დღე ყოველწლიურად აღინიშნება, როგორც კულტურებსა და ცივილიზაციებს შორის პატივისცემის, დიალოგისა და თანამშრომლობის აუცილებლობის შეხსენება. ტოლერანტობის დღის აღნიშვნა 1996 წელს გაეროს გენერალური ასამბლეის ინიციატივით დაიწყო. 1995 წლის 16 ნოემბერს იუნესკომ ტოლერანტობის პრინციპების შესახებ დეკლარაცია მიიღო.
