არასამთავრობო ორგანიზაცია "სრულიად საქართველოს სახალხო დარბაზის" წევრებმა რუსთაველის გამზირზე კონტრაქცია შეწყვიტეს და ორგანიზაციის ოფისში საგანგებო ბრიფინგი გამართეს.
როგორც ორგანიზაციის ხელმძღვანელმა გოდერძი ოთარაშვილმა განაცხადა, აქციის შეწყვეტის გადაწყვეტილება, სახელმწიფო ინტერესებიდან გამომდინარე მიიღეს.
" ჩვენი ორგანიზაციის წევრები მოემართებოდნენ აჭარიდან, იმერეთიდან, კახეთიდან, თუმცა დროებით ისინი გავაჩერეთ სახელმწიფო ინტერესებიდან გამომდინარე. ჩვენ დროებით, ოფისიდან დავაკვირდებით სიტუაციას. იმ შემთხვევაში, თუკი "ნაციონალები" არ დაიშლებიან, დესტრუქციულ ძალას არ მივცემთ ქვეყნის გადატრიალების საშუალებას და დავიძვრებით. თუ დაპირისპირება გახდა საჭირო, დავუპირისპირდებით კიდეც", - განაცხადა ოთარაშვილმა.
მანამდე, ორგანიზაციის წევრები რუსთაველის გამზირზე დროშებითა და ტრანსპარანტებით გადაადგილდებოდნენ.
მათი თქმით, პოლიციამ კონტრაქციის მონაწილეებს რამდენჯერმე მოუწოდეს, რომ "ნაციონალური მოძრაობის" აქციისთვის ხელი არ შეეშალათ, რის შემდეგაც "სრულიად საქართველოს სახალხო დარბაზის" წევრებმა აქციის შეწყვეტის გადაწყვეტილება მიიღეს.
შეგახსენებთ, „ერთიანმა ნაციონალური მოძრაობის" მიერ ორგანიზებული საპროტესტო აქცია "არა ანექსიას" - რუსთაველის გამზირზე, პარლამენტის შენობასთან 16:00 საათზე დაიწყება.
