ქალაქ თბილისის მერიისა და სსიპ „თბილისის არქიტექტურის სამსახურის" ინიციატივით, დღეს სასტუმრო „ქორთიარდ მარიოტში" გაიმართა კონფერენცია თემაზე - „ურბანული განვითარების თანამედროვე გამოწვევები ქალაქ თბილისში".
შეხვედრის მიზანი დედაქალაქში მშენებლობებთან დაკავშირებული პრობლემური საკითხების აქტუალიზაცია და ბიზნეს-კომპანიების, დეველოპერების, არქიტექტორების, მერიის სხვადასხვა საქალაქო სამსახურებისა და სსიპ „თბილისის არქიტექტურის სამსახურს" შორის თანამშრომლობის ფორმატის ჩამოყალიბება და ინფორმაციის გაცვლა იყო.
კონფერენცია თბილისის მერმა დავით ნარმანიამ გახსნა. თბილისის მერის თქმით, არქიტექტურული თვალსაზრისით არსებული მდგომარეობის მოწესრიგება მისი წინასაარჩევნო დაპირება და პროგრამის შემადგენელი ნაწილი იყო. მისივე თქმით, პროფესიულ წრეებთან შეხვედრა და ერთობლივი რეკომენდაციები თბილისის მთავრობას ქალაქის განაშენიანების გენერალური გეგმის შემუშავებაში დაეხმარება.
„ჩვენთვის მნიშვნელოვანია, მაქსიმალურად ფართო ჩართულობით განვავითაროთ დედაქალაქის განაშენიანების გეგმა, ამ თვალსაზრისით, მნიშვნელოვანია იმ ადამიანების მოსაზრებების მოსმენა, რომლებიც წლების განმავლობაში მუშაობდნენ და უზარმაზარი გამოცდილება დაუგროვდათ ამ სფეროში," - განაცხადა დავით ნარმანიამ.
კონფერენცია ინტერაქტიულ ფორმატში წარიმართა. გამოითქვა მოსაზრებები თბილისის გენერალურ გეგმასა და თბილისის სტრატეგიული განვითარების გეგმასთან დაკავშირებით. შეხვედრის მონაწილეებმა ასევე იმსჯელეს ისეთ პრობლემურ თემებზე, როგორიცაა ბინების რაოდენობასთან ავტოსადგომების შესაბამისობა, სამშენებლო ტერიტორიაზე ნარგავების მოჭრა, დაბალი ინტენსივობის ზონებში მაღალი ინტენსივობის საცხოვრებელი სახლების განვითარება, ლანდშაფტური ზონის ცვლილება, ტერიტორიების ექსტენსიური განვითარება, ჯიხურების განთავსება, ტერიტორიების მოუწესრიგებელი განვითარება და სხვა.
კონფერენციას, ესწრებოდნენ ეკონომიკისა და მდგრადი განვითარების, კულტურისა და ძეგლთა დაცვისა და იუსტიციის სამინისტროს, თბილისის საკრებულოს, არქიტექტორთა კავშირისა და კერძო სამშენებლო კომპანიების წარმომადგენლები. თბილისის მერიის არქიტექტურის სამსახური სისტემატურად გამართავს საჯარო დიალოგს ბიზნეს-კომპანიებთან და დეველოპერებთან, რათა განხორციელდეს ქალაქის სწორი განვითარება ისე, რომ ხელი არ შეეშალოს ბიზნესის განვითარებას.