ჯანდაცვის და სოციალური მომსახურების გაუმჯობესება, დედაქალაქის გამწვანება და ეკოლოგიური მდგომარეობის მოწესრიგება, საბავშვო ბაღებში მდგომარეობის გაუმჯობესება და დამატებით ახალი ბაღების გახსნა, მუნიციპალური ინფრასტრუქტურის მოდენრიზაცია - თბილისის მერმა დავით ნარმანიამ მთავრობის დღევანდელ სხდომაზე 2015 წლის ბიუჯეტის პრიორიტეტები დაასახელა.
დავით ნარმანიას თქმით, 2015 წლის ბიუჯეტის ძირითადი პარამეტრები 800 მილიონ ლარამდე იქნება.
„დედაქალაქის მთავრობამ აქტიურად იმუშავა სხვა ცალკეულ მიმართულებებზე და წინასაარჩევნო დაპირებების შესრულებაზე, რისთვისაც ჩვენ მხარი დაგვიჭირა ამომრჩეველმა. ის შესაძლებლობები, რაც ჩვენ გვაქვს 2015 წლის ბიუჯეტით, მაქსიმალურად იქნება გამოყენებული იმისათვის, რომ მთავარი პრობლემური საკითხები და დედაქალაქის განვითარებასთან დაკავშირებული ძირითადი მიმართულებები უზრუნველყოფილი იყოს," - განაცხადა დავით ნარმანიამ. ამასთან, მისივე თქმით, საჭიროებები ბევრია და ცენტრალური ხელისუფლებიდან დამატებითი დაფინანსების შემთხვევაში, შესაძლებელი გახდება მეტი საკითხის მოგვარება.
თბილისის მერმა ისაუბრა ჯანდაცვისა და კეთილმოწყობის კუთხით რამდენიმე ახალი პროგრამისა და პროექტის შესახებაც, რომელიც 2015 წელს დაიწყება. მისივე თქმით, დაახლოებით 30 მილიონამდე ლარით გაიზრდება გამგეობების დაფინანსება, რაც იმას ნიშნავს, რომ გამგეობები ადგილზე მეტი პრობლემის მოგვარებას - კერძოდ, ბინათმესაკუთრეთა ამხანაგობების მხარდაჭერას, შიდარაიონული ინფრასტრუქტურის მოწესრიგებას და ავარიული სახლების გამაგრებას შეძლებენ.