მომავალი წლიდან მიუსაფართა თავშესაფრის მოვლა-პატრონობის პროგრამა ამოქმედდება, - განაცხადა თბილისის მერმა დავით ნარმანიამ დედაქალაქის მერიაში გამართულ პრესკონფერენციაზე გააკეთა, სადაც მან 2015 წლის ბიუჯეტის ძირითად პარამეტრებსა და პრიორიტეტებზე ისაუბრა.
თბილისის მერის განმარტებით, პროგრამას თბილისის მერია 1 200 000 ლარით დააფინანსებს.
ნარმანიას განმარტებით, პროგრამის მიზანია, თბილისში მოსკოვის პროსპექტზე არსებულ თავშესაფარში მცხოვრები მიუსაფარი პირების უზრუნველყოფა.
ასევე გაორმაგდება სოციალურად დაუცველი მრავალშვილიანი ოჯახებისათვის 18 წლამდე ასაკის თითოეულ ბავშვზე ყოველთვიური დახმარება. ნაცვლად 25 ლარისა, რასაც იღებდნენ სოციალურად დაუცველი ოჯახები თითოეულ ბავშვზე, მიიღებენ 50 ლარს. ჯამური ბიუჯეტი - 7 მილიონი ლარი.
5 მილიონი ლარით გაიზრდება თბილისის მუნიციპალიტეტის გამგეობების მიერ სოციალურად დაუცველი პირების დაფინანსება. ამ მიმართულებით, ნაცვლად 2014 წელს გამოყოფილი 9 მილიონისა, 2015 წელს 14 მილიონი ლარი დაიხარჯება.
დაიწყება პროფესიული განათლების ხელშეწყობის პროგრამა, რომლის ფარგლებშიც მოხდება სოციალურად დაუცველი სტუდენტების დაფინანსება - 950 000 ლარი.
