დღეს, თბილისის მუნიციპალიტეტის საკრებულოში ადამიანის უფლებათა დაცვისა და სამოქალაქო ინტეგრაციის სხდომაზე დიდი ლილოს დასახლებაში უსახლკაროთა თავშესაფრის მშენებლობაზე იმსჯელეს. სხდომას მერიის წარმომადგენლების გარდა დასახლების მაცხოვრებლებიც ესწრებოდნენ, რომლებმაც მათთვის აქტუალური შეკითხვები და კომენტარები გააჟღერეს.
თბილისის მუნიციპალიტეტის მერიის ჯანდაცვისა და სოციალური მომსახურების საქალაქო სამსახურის უფროსის პირველმა მოადგილემ, გიორგი სანიკიძემ კომისიის წევრებსა და მოწვეულ სტუმრებს „უსახლკაროთა თავშესაფრის" პრეზენტაციის პირველი ნაწილი წარუდგინა, რასაც თვალსაჩინოებისათვის ფოტო მასალაც ახლდა.
პრეზენტაციაში საუბარი ისეთ საკითხებზე იყო, როგორიცაა თავშესაფრის გარეგნული და შინაარსობრივი აღწერა. მერიის წარმომადგენლებმა აგრეთვე ვრცლად ისაუბრეს თავშესაფრის მნიშვნელობაზე, რისთვისაც მსოფლიო პრაქტიკის მაგალითებიც მოიშვეილეს.
კომისიის თავმჯდომარის, გულიკო ზუმბაძის განცხადებით, მიზანშეუწონელია იმ ტერიტორიაზე თავშესაფრის მშენებლობა, სადაც ნაგავსაყრელის პრობლემა ჯერ კიდევ აქტუალურია. „დღეს ჩვენ მივიღეთ მერიის წარმომადგენლებისაგან ინფორმაცია, თუ რა ტიპის დაწესებულებაზეა საუბარი. ეს იყო პრეზენტაციის პირველი ნაწილი და ჩვენ კვლავაც გვაქვს კრიტიკული შეკითხვები საკითხთან მიმართებაში, კერძოდ კი ტერიტორიის შერჩევასთან დაკავშირებით. უახლოეს მომავალში ველოდებით პრეზენტაციის მეორე, უფრო დასრულებულ ვარიანტს, რის შემდეგაც შევძლებთ უკეთ განვსაზღვროთ და შევაჯეროთ მოსახლეობის ნება სახელმწიფოებრივ ნებასთან. მნიშვნელოვანია, რომ არა მხოლოდ უსახლკაროთა უფლებები იქნეს დაცული, არამედ დასახლებაში მცხოვრები ადამიანების ინტერესებიც იქნეს გათვალისწინებული. აგრეთვე მივიღეთ გადაწყვეტილება, რომ დიდი ლილოს დასახლება უფრო მიმზიდველი გავხადოთ, განვავითაროთ სოციალური, კულტურული და ინფრასტრუქტურული მიმართულებები. კერძოდ კი, გაშენდეს სკვერები, სტადიონები, საცურაო აუზები და სხვა. "-განაცხადა გულიკო ზუმბაძემ.