თბილისის საკრებულო მიმართავს საქართველოს პარლამენტს, რათა ხმაურის შემცირების გადაუდებელ ღონისძიებათა მარეგულირებელ საკანონმდებლო ნორმებში შევიდეს ცვლილებები. კერძოდ, თბილისის მუნიციპალიტეტის მერიის ზედამხედველობის საქალაქო სამსახური აღიჭურვოს კონტროლის ისეთი მექანიზმით, რომელიც უფრო ეფექტიანი იქნება და სწორედ ამ სამსახურს მიენიჭოს დამრღვევის დაჯარიმების უფლებამოსილება.
ეს გადაწყვეტილება მიიღეს თბილლისის საკრებულოს იურიდიულ საკითხთა კომისიის ინიციატივით გაიმართულ შეხვედრაზე, რომელიც თბილისის ტერიტორიაზე საცხოვრებელ და საზოგადოებრივ ზონებში ხმაურის შემცირების გადაუდებელი ღონისძიებების გატარებას ეხებოდა.
შეკრებილმა სხვადასხვა უწყების წარმომადგენლებმა ტაბიძის ქუჩის მაცხოვრებლებს მოუსმინეს და ამ პრობლემის მოსაგვარებლად საკუთარი მოსაზრებები დააფიქსირეს.
გამოითქვა მოსაზრება, რომ ზედამხედველობის სამსახური აღიჭურვოს უფლებით, თავად გამოწეროს ჯარიმა ხმაურის დადგენილი ზღვარის გადაჭარბების გამო და ამასთანავე, გაიზარდოს ჯარიმის ოდენობა, რათა რესტორნებისა და კაფე-ბარების მეპატრონეებისათვის ეს თანხა საგრძნობი იყოს და მათ ამ ნორმების დარღვევის სურვილი აღარ გაუჩნდეთ.
თბილისის ტერიტორიაზე საცხოვრებელ და საზოგადოებრივ ზონებში ხმაურის შემცირების გადაუდებელ ღონისძიებათა გატარებას რამდენიმე ნორმატიული აქტი არეგულირებს, რომელთა ანალიზის შედეგად ირკვევა, რომ დედაქალაქში ხმაურის ნორმების დადგენა და მათ დაცვაზე ზედამხედველობის სფეროში შესაბამისი რეგულაციის დადგენის უფლებამოსილება თბილისის მუნიციპალიტეტს არ გააჩნია.
იურიდიულ საკითხთა კომისიის თავმჯდომარემ, თედო კობახიძემ შეხვედრის შეჯამებისას აღნიშნა, რომ საჭიროა თბილისის საკრებულომ საკანონმდებლო ინიციატივით მიმართოს საქართველოს პარლამენტს.
