მასშტაბური სარეკონსტუქციო სამუშაოების შემდეგ, სამხრეთ ოსეთის მხრიდან საქართველო-რუსეთის დამაკავშირებელი როკის გვირაბი დღეს გაიხსნა.
გვირაბის შეკეთება ოთხი წლის წინ რუსულმა მხარემ დაიწყო და ამ დროისთვის ის ყველა თანამედროვ სტანდარტს სრულად აკმაყოფილებს. გვირაბის რეკონსტრუქციისთვის სპეცტექნიკა ოკუპირებულ სამხრეთ ოსეთში სოჭიდან შეიყვანეს.
იმის გამო, რომ ფერდობებიდან გამუდმებით ქვები ცვიოდა, რეკონსტრუქციამდე როკის გვირაბი ტრანსკავკასიურ მაგისტრალზე ერთ-ერთ საშიშ მონაკვეთად ითვლებოდა, დღეიდან კი ეს მონაკვეთი მგზავრობისთვის უსაფრთხო და კომფორტული გახდა.
კავკასიის მთავარ ქედზე, ზღვის დონიდან 2 ათასი მეტრის სიმაღლეზე როკის 3, 7 კმ სიგრძის გვირაბი 1985 წელს გაიყვანეს. სწორედ ამ გვირაბზე გადის მთავარი ტრანსკავკასიური მაგისტრალი, რომელიც საქართველოს რუსეთთან აკავშირებს.
რუსეთის ფედერაციის ტრანსპორტის სამინისტროს წარმომადგენელთა თქმით, გვირაბის კაპოტალური რემონტი 16 მილიარდი რუსული რუბლი დაჯდა.