თბილისის მთავრობის დღევანდელ სხდომაზე პრობლემური მშენებლობების შემსწავლელი სპეციალური კომისიის შექმნის შესახებ იმსჯელეს და კომისიის შემადგენლობა დაამტკიცეს. პრობლემური მშენებლობების შემსწავლელ კომისიას თბილისის მერი დავით ნარმანია უხელმძღვანელებს. კომისიის შემადგენლობაში არიან თბილისის მერის მოადგილე ნინა ხატისკაცი, შესაბამისი საქალაქო სამსახურების ხელმძღვანელები, თბილისის საკრებულოს წევრები, ასევე ეკონომიკისა და მდგრადი განვითარების სამინისტროს წარმომადგენლები. კომისიის დებულებას საკრებულო უახლოეს პერიოდში დაამტკიცებს.
როგორც მთავრობის სხდომაზე თბილისის მერმა განაცხადა, პრობლემურ მშენებლობებთან დაკავშირებით სხვადასხვა უწყებებმა ერთობლივად უნდა იმსჯელონ, რათა არ დაზარალდეს ინვესტორი და ამასთან, გათვალისწინებული იყოს ქალაქის ინტერესები.
თბილისის მერის მოადგილის ნინა ხატისკაცის თქმით, თითოეულ პრობლემურ მშენებლობასთან დაკავშირებით გადაწყვეტილებას კომისია მიიღებს.
„მსგავსი მშენებლობის მაგალითად დიღმის ტყე პარკი შეიძლება მოვიყვანოთ, როდესაც პარკს სტატუსი შეეცვალა და გასხვისდა, თუმცა ჩვენ მიგვაჩნია, რომ ეს ტერიტორია უნდა შენარჩუნდეს იმ სტატუსით, რაც მას გააჩნდა",- განაცხადა ნინა ხატისკაცმა
მასალის გამოყენების პირობები
