თავდაცვის სამინისტროს თანამშრომლებმა უკვე ყოფილი ხელმძღვანელი ირაკლი ალასანია ტაშით გააცილეს. როგორც ალასანიამ თავდაცვის უწყების თანამშრომლებთან დამშვიდობებისას განაცხადა, საქართველოს უკეთესი მომავლისთვის ბრძოლა უნდა გაგრძელდეს.
,,ყველას მინდა დიდი მადლობა გითხრათ რომ ეს წლები ერთად ვიმუშავეთ და ძალიან ბევრი კარგი საქმე ერთად გავაკეთეთ, წამოვიწყეთ, რაღაცეები ბოლომდე ვერ მივიყვანეთ და მე ამაყი ვარ პირველ რიგში იმით რომ ესეთ კოლექტივთან, ესეთ ხალხთან, ესეთ სამხედროებთან და სამოქალაქოებთან ორი წელი გავატარე", _განაცხადა ალასანიამ.
ალასანიას განმარტებით, ერთ-ერთი მთავარი რითიც ის ამაყობს არის ის, რომ თავდაცვის უწყება არაპოლიტიკური გახდა.
,, ის რა გადაწყვეტილებებიც იქნა მიღებული არ უნდა შეეხოს შეიარაღებულ ძალებს და არ უნდა შეეხოს სისტემის ფუნქციონირებას, მუშაობას. ჩვენ მაშინ ვართ ძლიერები როცა ასეთი რყევები არ ეხება ინსტიტუტებს და ასეთი ქვეყანა გვინდა გვქონდეს. ამიტომ მე მინდა დიდი მადლიერების გრძნობით ამ წლების რომელიც ერთად გავატარეთ, ასევე დიდი მომავალი იმედებით დაგემშვიდობოთ", - განაცხადა ალასანიამ.
