პარლამენტის თავდაცვისა და უშიშროების კომიტეტის ორგანიზებით და საქართველოში ნატო-ს სამეკავშირეო ოფისის მხარდაჭერით თემაზე: "საპარლამენტო ზედამხედველობა თავდაცვისა და უსაფრთხოების ინსტიტუტებზე" მრგვალი მაგიდა გაიმართა.
ღონისძიების მონაწილეებს მისასალმებელი სიტყვით პარლამენტის თავმჯდომარის მოადგილემ, ზურაბ აბაშიძემ, ნატო-ს სამეკავშირეო ოფისის ხელმძრვანელმა, უილიამ ლაჰიუმ და თავდაცვისა და უშიშროების კომიტეტის თავმჯდომარემ, ირაკლი სესიაშვილმა მიმართეს.
აღმასრულებელი და საკანონმდებლო ხელისუფლების წარმომადგენლებმა, ნატო-ს საპარლამენტო ასამბლეის წევრებმა, საერთაშორისო ექსპერტებმა და არასამთავრობო ორგანიზაციების წარმომადგენლებმა საქართველოს თავდაცვის და უსაფრთხოების უწყებებზე საპარლამენტო ზედამხედველობის განხორციელების კუთხით არსებულ მდგომარეობაზე, საერთაშორისო პრაქტიკასა და ნატო-ს წევრი სახელმწიფოების გამოცდილებაზე მოხსენებები წარმოადგინეს.
მრგვალი მაგიდის ფორმატში გამართულ შეხვედრაზე უცხოელმა ექსპერტებმა, „შეიარაღებულ ძალებზე დემოკრატიული კონტროლის ჟენევის ცენტრის" წარმომადგენელმა, იდენ კოლიმ და ნატო-ს საპარლამენტო ასამბლეის უსაფრთხოების სამოქალაქო განზომილების კომიტეტის წევრმა, ანდრიუს ავიზიუსმა მოხსენებები შეიარაღებულ ძალებსა და უსაფრთხოების ინსტიტუტებზე პარლამენტის ზედამხედველობის გაძლიერებასთან დაკავშირებით წარმოადგინეს.
საქართველოს პარლამენტთან თავდაცვისა და უსაფრთხოების ინსტიტუტების თანამშრომლობაზე ისაუბრა თავის გამოსვლაში კომიტეტის თავმჯდომარემ, ირაკლი სესიაშვილმა. მისი განცხადებით, თავდაცვის მიმართულებით საპარლამენტო კონტროლი მნიშვნელოვან საკითხს წარმოადგენს, იმდენად რამდენადაც ეს ინსტიტუტი თავისი არსით მეტწილად დახურული სფეროა. „პარლამენტი არის ხიდი, რომელმაც სწორად უნდა განსაზღვროს რა იყოს გამჭვირვალე და რა დოზით მიაწოდოს ინფორმაცია საზოგადოებას. მთავარია საპარლამენტო კონტროლი პრაგმატულად წარიმართოს და თანამშრომლობა საკანონმდებლო და აღმასრულებელ ხელისუფლებას შორის ორმხრივად და კონსტრუქციულად წარიმართოს", - აღნიშნა ირაკლი სესიაშვილმა.
მისივე განცხადებით, კომიტეტს თავდაცვის სამინისტროსთან თანამშრომლობის კარგი ტრადიცია ჩამოუყალიბდა, შინაგან საქმეთა სამინისტროსთან კი სამუშაო პროცესი გრძელდება და კომიტეტი ამ უწყებასთან მეტის გაკეთებას გეგმავს.
თავდაცვისა და უსაფრთხოების ინსტიტუტებზე საპარლამენტო ზედამხედველობის თემაზე მოხსენებები თავდაცვის მინისტრის და ეროვნული უშიშროების საბჭოს მდივნის მოადგილეებმაც წარმოადგინეს.
ძირითადი მოხსენებების შემდეგ ღია დისკუსია გაიმართა, რომელზეც წარმოდგენილი იყო წინადადებები და რეკომენდაციები ძალოვან ინსტიტუტებთან საპარლამენტო ზედამხედველობის და მონიტორინგის მიმართულებით.
