საქართველოში ვიზიტად მყოფმა თურქეთის რესპუბლიკის დიდი ეროვნული ასამბლეის თავმჯდომარე ჯემილ ჩიჩექმა საქართველოს პარლამენტის თავმჯდომარე და საპარლამენტო დელეგაცია თურქეთში მიიწვია და იმედი გამოთქვა, რომ ეს ვიზიტი ახლო მომავალში შედგება.
„მინდა ვთქვა, რომ ჩვენი ურთიერთობა არის სამაგალითო მსოფლიოსათვის, ესაა სტრატეგიული თანამშრომლობა, რომელიც ემყარება სამთავრობო ურთიერთობებს, მაგრამ ამის საფუძველთა საფუძველს წარმოადგენს ხალხთა შორის არსებული ურთიერთობები, ამას შესანიშნავად ასხავს ის ფაქტი, რომ ჩვენს ქვეყნებს შორის არის უვიზო და გამარტივებული მიმოსვლა. საქართველოში სტაბილურობა, კეთილდღეობა და წინსვლა ჩვენთვის ძალიან მნიშვნელოვანია, რადგან ჩვენ ვიზიარებთ საერთო გეოგრაფიულ რეგიონს და ამ რეგიონის ერთ-ერთ მთავარ წერტილს წარმოადგენს საქართველო. ამიტომ ვუჭერთ მხარს საქართველოს ინტეგრაციას ევროატლანტიკურ სტრუქტურებში", _განაცხადა ჩიჩექმა დავით უსუფაშვილთან შეხვედრის შემდეგ გამართულ ერთობლივ პრესკონფერენციაზე.
ამასთან მან ისაუბრა იმ პროექტებზე, რომლებსაც თურქეთი საქსართველოსთან და აზერბაიჯანთან ერთად ახორციელებს, ესაა უკვე განხორციელებული ნავთობსადენისა და გაზსადენის პროექტები, 2015 წლისათვის დაგეგმილი სარკინიგზო მაგისტრალის პროექტი და სხვა პროექტები, რომლებზეც მუშაობა მიმდინარეობს.
ჯემილ ჩიჩექის განცხადებით ქვეყნებს შორის ურთიერთობა სცილდება მეზობლურ და მეგობრულ ურთიერთობას, რაც ყველასათვის სამაგალითოა.