დედაქალაქის მერიის თანამშრომელთა ტესტირების მეორე ეტაპზე, 278 აპლიკანტიდან რეგისტრაცია 244 მათგანმა გაიარა, 34 კი რეგისტრაციაზე არ გამოცხადდა.
ტესტირების პირველ ნაკადზე 242 აპლიკანტიდან, მინიმალური ზღვარი 84-მა აპლიკანტმა გადალახა, რაც დაახლოებით 35%-ია, 158-მა მათგანმა კი, მერიის მიერ დადგენილი 75% -იანი ბარიერი ვერ გადალახა. ტესტირების შემდეგ აპლიკანტთა ნაწილი აცხადებს, რომ ტესტები საკმაოდ რთული იყო.
შეფასების და გამოცდების ეროვნული ცენტრის დირექტორის მაია მიმინოშვილის განცხადებით, ტესტირების შინაარსობრივი და ორგანიზაციული ნაწილი შეფასების და გამოცდების ეროვნული ცენტრის მიერ მომზადდა და შესაბამისად, ტესტური დავალებების კონფიდენციალურობასთან დაკავშირებით პასუხისმგებლობას ცენტრი იღებს. მისივე თქმით, მერიას და სხვა უწყებებს ტესტურ დავალებებთან ხელმისაწვდომობა არ გააჩნია.
ტესტირება ტექნიკური უნივერსიტეტის პირველ კორპუსში ტარდება.
თითოეულმა აპლიკანტმა, მერიის მიერ დაწესებული 75% -იანი ბარიერის გადასალახად, 60 საკითხიდან მინიმუმ 45 -ს უნდა გასცეს სწორი პასუხი.