საბურთალოს რაიონის მაცხოვრებლებს კიდევ ერთი სკვერი შეუნარჩუნდება.
როგორც თბილისის მუნიციპალიტეტის საკრებულოს დამოუკიდებელმა დეპუტატმა ალექსანდრე ელისაშვილმა განაცხადა, მას რამდენიმე კვირის წინ ვაჟა-ფშაველას 26-ში მცხოვრებმა მოსახლეობამ მიმართა და ყაზბეგის #25 -27 კორპუსებს შორის მდებარე სკვერისათვის რეკრეაციული ზონის სტატუსის დაბრუნება სთხოვა.
საბურთალოს მაჟორიტარი დეპუტატის თქმით, დედაქალაქის საკანონმდებლო ორგანოს ურბანული დაგეგმარებისა და გარემოს დაცვის კომისიებმა მხარი დაუჭირეს მის ინიციატივას, რის შემდეგაც მომზადდა ერთობლივი წერილი და გადაეგზავნა მერიის შესაბამის სამსახურებს.
ყაზბეგის #25-27 კორპუსებს შორის მდებარე სკვერი 90 -იან წლებში კერძო პირმა შეისყიდა, თუმცა მოსახლეობამ მას წინააღმდეგობა გაუწია და მიწის მეპატრომემ სახლის აშენება ვერ შეძლო.
ალექსანდრე ელისაშვილის განცხადებით, წინა მოწვევის საკრებულომ აღნიშნულ სკვერს რეკრეაციული ზონის სტატუსი მოუხსნა, მერიამ კი მესაკუთრეს რვა სართულიანი კორპუსის მშენებლობის უფლება მისცა.
,,მესაკუთრის მიერ ეტაპობრივად ხორციელდებოდა მწვანე ნარგავების ხელოვნურად განადგურება. გაჩეხილია ბუჩქნარი და მოჭრილია სხვადასხვა ჯიშის ხე. მჯერა, რომ ძალიან მალე სკვერს პირვანდელი სახე დაუბრუნდება და საბურთალოს კიდევ ერთი დასასვენებელი ადგილი შეემატება",- განაცხადა ალექსანდრე ელისაშვილმა.
მასალის გამოყენების პირობები