დღეს, 27 ოქტომბერს, პარლამენტში ჯანმრთელობის დაცვისა და სოციალურ საკითხთა კომიტეტის თავმჯდომარის, დიმიტრი ხუნდაძის ინიციატივით სოლიდარობის ფონდის პრეზენტაცია გაიმართება
პრემიერ მინისტრის ინიციატივით შექმნილი სოლიდარობის ფონდი ჯანდაცვის სამინსიტროსა და მთავრობის ადმინისტრაცის ერთობლივი ძალისხმევით ჩამოყალიბდა. ფონდი, როგორც არასამეწარმეო (არაკომერციული) იურიდიული პირი მთავრობის განკარგულებით
2014 წლის 9 ივნისს დაფუძნდა.
ფონდის მიზანია საზოგადოების, კერძო სექტორისა და სახელმწიფოს თანამონაწილეობით, საქართველოში მცხოვრები სოციალურად დაუცველი ან კატასტროფული სოციალური და სამედიცინო დანახარჯების რისკის წინაშე მდგარი ბავშვებისა და ოჯახებისთვის ალტერნატიული (არასაბიუჯეტო) რესურსების მობილიზაცია.
2014 წლის აგვისტოდან საქართველოს სოლიდარობის ფონდი განიხილავს 18 წლამდე ასაკის სოლიდური სიმსივნეების მქონე ბავშვების დასახმარებლად განცხადებებს. სოლიდური სიმსივნეები წარმოადგენს სხვადასხვა ორგანოსა და ქსოვილის სიმსივნურ დაავადებებს გარდა სისხლის/სისხლმბადი ორგანოების სიმსივნეებისა. 1-ელ დეკემბრამდე ფონდი გამოაქვეყნებს ინფორმაციას 19-21 წლის ასაკის ონკოლოგიური დაავადებების მქონე ბენეფიციართა შესაძლო დაფინანსების თაობაზე.
2015 წლის მარტში ფონდი შეიმუშავებს შშმპ და იშვიათი დაავადებების მქონე ბავშვების დახმარების პროგრამებს, ხოლო 2016 წლიდან შესაძლებელი იქნება ინდივიდუალური პატრონაჟის (სპონსორობის) პროგრამების ამუშავება სიღარიბეში მცხოვრები ბავშვებისა და მარტოხელა ასაკით პენსიონერებისათვის. ფონდი ბენეფიციარებს დააფინანსებს სოციალური სტატუსის მიუხედავად.
სოლიდარობის ფონდში შეტანილ განცხადებას იხილავს ფონდის მუდმივმოქმედი კომისია.
სოლიდარობის ფონდმა ამოქმედებიდან დღემდე საერთო ჯამში ონკოლოგიური დაავადებების მქონე 22 ბავშვისა და ახალგაზრდის დიაგნოსტიკისა და მკურნალობის თანადაფინანსება დაამტკიცა.
საერთო ჯამში 22 პაციენტისათვის დამტკიცებული თანხა 455 367 ლარს შეადგენს, მათ შორის 15 პაციენტი სამედიცინო მომსახურებას საქართველოში მოქმედ კლინიკებში, ხოლო 7 პაციენტი თურქეთის, საფრანგეთისა და გერმანიის კლინიკებში მიიღებს.
