აბსოლუტურად მიუღბელია, რომ ეს შენობა გადაეცეს მუსულმანურ სამმართველს, რადგან აქ არასოდეს არ უმოქმედია მეჩეთს და ისორიულად, არის მონასტრის ნანგრევებზე აშენებული - ამის შესახებ, ადიგენის რაიონის სოფელ მოხეში განვითარებულ მოვლენებთან დაკავშირებით, ახალციხისა და ტაო-კლარჯეთის მიტროპოლიტმა, საქართველოს კათოლიკო-პატრიარქის ქორეპისკოპოსმა, მეუფე თეოდორემ განაცხადა.
მეუფის თქმით, სადაო შენობის ადგილზე, ქრისტიანული ტაძრის არსებობა დადასტურდება, თუ მისი საფუძვლიანი შესწავლა მოხდება. შესაბამისად, აღნიშნული შენობა საქართველოს საპატრიარქოს უნდა გადაეცეს. მისივე თქმით, სოფელში არაერთი მოქმედი მეჩეთია და ადგილობრივ მუსლიმ მრევლს მუსულმანურ მსახურებაზე დასწრების პრობლემა არ აქვს.
მეუფის განცხადებას სამცხე-ჯავახეთის მუფტი მამუკა ვაშაყმაძე გამოეხმაურა. მისი თქმით, პრობლემამ შესაძლოა ქვეყანაში დესტაბილიზაცია გამოიწვიოს, რაზეც პასუხისმგებელი საქართველოს საპატრიარქო იქნება.