სამედიცინო საქმიანობის სახელმწიფო რეგულირების სააგენტოს მიერ, პერმანენტულად მიმდინარეობს ფარმაცევტული დაწესებულებების კონტროლი. როგორც ,,ჯი-ეიჩ-ენს" ჯანდაცვის სამინისტროდან აცნობეს დღეის მდგომარეობით, კონტროლის ღონისძიებები მიმდინარეობს 11 ფარმაცევტულ დაწესებულებაში, რომლის შედეგადაც გამოვლენილია სხვადასხვა ტიპის სამართალდარღვევები. მათ შორის 3 აფთიაქში სპეციალურ კონტროლს დაქვემდებარებული სამკურნალო საშუალებების გაცემისა და აღრიცხვის წესების დარღვევა და მეორე ჯგუფს მიკუთვნებული ფარმაცევტული პროდუქტის ფორმა N3 რეცეპტის გარეშე გაცემა, 7 დაწესებულებაში - მხოლოდ მეორე ჯგუფის ფარმაცევტული პროდუქტის რეცეპტის გარეშე რეალიზაცია, ხოლო 1 დაწესებულებაში - სამკურნალო საშუალებების შენახვის პირობების დარღვევა.
აღნიშნულ დაწესებულებებში გრძელდება მუშაობა, დასრულებისთანავე შედგება ადმინისტაციული სამართალდარღვევის ოქმები, რომლებიც განსახილველად გადაეგზავნება თბილისის საქალაქო სასამართლოს ადმინისტრაციულ საქმეთა კოლეგიას.
2014 წლის განმავლობაში, კონტროლის ღონისძიებების შედეგად გამოვლენილ სამართალდარღვევებზე სულ შედგენილია 164 ადმინისტრაციული სამართალდარღვევის ოქმი, მათ შორის I ჯგუფს მიკუთვნებული ფარმაცევტული პროდუქტის ლეგალური ბრუნვის წესების დარღვევაზე 107, მათგან 8 დაწესებულება სპეციალურ კონტროლს დაქვემდებარებული სამკურნალო საშუალებების მიმოქცევას ახორციელებდა ავტორიზებული აფთიაქის ნებართვის გარეშე.
შეგახსენებთ, რომ 2014 წლის 1 სექტემბრიდან ,,წამლისა და ფარმაცევტული საქმიანობის შესახებ" საქართველოს კანონში შევიდა ცვლილება, რომლის თანახმად აიკრძალა II ჯგუფს მიკუთვნებული ფარმაცევტული პროდუქტის რეალიზაცია რეცეპტის გარეშე. პირველი სექტემბრიდან დღემდე, ინსპექტირების შედეგად, 27 სააფთიაქო დაწესებულებაში დაფიქსირებულია ფარმაცევტული პროდუქტის ფორმა N3 რეცეპტის გარეშე რეალიზაციის ფაქტი, რომლებზეც შედგენილია ადმინისტრაციული სამართალდარღვევის ოქმები და გადაგზავნილია შესაბამის საქალაქო და რაიონულ სასამართლოებში.
მიმდინარე წელს გატარებული საკანონმდებლო ცვლილებების შედეგად, გასულ წელთან შედარებით 70%-ით შემცირებულია იმ 6 ნივთიერების (გაბაპენტინი, ბაკლოფენი, ტროპიკამიდი, ზოპიკლონი, ზალეპლონი, დექსტრომეტორფანი) იმპორტირებული რაოდენობა, რომლებიც გამოიყენება თრობის მისაღწევად, რაც იმის დასტურია, რომ ქვეყანაში შემცირებულია სააფთიაქო ნარკომანია.
კონტროლის ღონისძიებები პერმანენტულად, გაგრძელდება როგორც თბილისში, ასევე რეგიონებში.
