ხულოს მუფტის გურამ აბაშიძის განცხადებით, თუ მოხეში დაკავებულ პირებს არ გაათავისუფლებენ, ფართომასშტაბიანი აქციები დაიწყება. მისი თქმით, შენობა, რომელმაც დავა გამოიწვია, არის ისტორიული მეჩეთი და მის დათმობას არ აპირებენ. ამის შესახებ მუფთმა, სამცხე-ჯავახეთის სამხარეო მთავარი სამმართველოს პოლიციის შენობასთან განაცხადა, სადაც გუშინდელი ინცინდენტის დროს დაკავებული პირები არიან გადაყვანილნი.
"ვნახოთ, როგორ გადაწყდება სამართალდამცავების მხრიდან იმ14 ადამიანის ბედი. ჩვენი მხრიდან საპასუხო იქნება ის, რომ ფართომასშტაბიანი აქცია გაიმართება არა მარტო დღეს, არამედ, ხვალაც გაგრძელდება და ის მარტო პოლიციის სამმართველოს ტერიტორიას არ მოიცავს", - აცხადებს ხულოს მუფტი.
ადიგენის რაიონის სოფელ მოხეში პოლიციასა და მოსახლეობას შორის მომხდარი დაპირისპირების შედეგად, პოლიციისთვის წინააღმდეგობის გაწევისა და წვრილმანი ხულიგნობის ბრალდებით, გუშინ 14 პირი დააკავეს. აქედან, სამ პირს ბრალი სისხლის სამართლის კოდექსის 353-ე მუხლის მე-2 ნაწილით, ხოლო თერთმეტს ადმინისტრაციულ სამართალდარღვევათა კოდექსის 166-ე მუხლით ედებათ.
