თბილისის მერის მოადგილე ნინა ხატისკაცი დედაქალაქის მერიის შენობის წინ გამართული ორგანიზაცია „პარტიზანული მებაღეობის" აქციის წარმომადგენელთა ჯგუფს შეხვდა. „პარტიზანული მებაღეობა" დედაქალაქის მერიასთან დიალოგის სურვილს გამოთქვამს. ორგანიზაციის ხელმძღვანელის ნატა ფერაძის თქმით, დღევანდელი შეხვედრა ღია დიალოგის დაწყების კარგი პრეცედენტია. ფერაძე იმედოვნებს, რომ დედაქალაქში არსებული პრობლემური საკითხები ერთობლივად გადაიჭრება.
თბილისის მერის მოადგილის ნინა ხატისკაცის განცხადებით, დღევანდელ შეხვედრაზე ქალაქის გამწვანებასთან და იერსახესთან დაკავშირებით სამომავლო გეგმებზე იმსჯელეს. არანაკლებ მნიშვნელოვანი იყო პრობლემური მშენებლობები, რომელიც ერთის მხრივ მწვანე ნარგავების გაჩეხვას უკავშირდება და მეორეს მხრივ შენობების მშენებლობას, ზოგ შემთხვევაში, ყოფილ სარეკრეაციო ზონაში.
„ეს არ იყო პირველი შეხვედრა, რადგან ჩვენ ამ ადამიანებთან მუდმივი კომუნიკაცია გვაქვს. დაბეჯითებით მინდა ვთქვა, რომ დღეს განხილულ არცერთ თემაზე მერიასთან კომუნიკაციის პრობლემა არ არსებობს. მათთვის უფრო მეტად საინტერესო სამომავლო გეგმები და სტრატეგიაა, რაზეც თბილისის მთავრობა მუშაობს. ამოცანა საკმაოდ მრავალხმრივია, ერთის მხრივ არ უნდა გავჩერდეთ, მეორეს მხრივ უკვე უნდა დავდოთ ისეთი დოკუმენტები და სამოქმედო გეგმები, რომელიც არ არსებობდა და სწორედ ამაზე დავაფუძნოთ ჩვენი სამომავლო საქმიანობა. ჩვენ შევთანხმდით რომ ნებსიმიერი დოკუმენტს, რომელიც ქალაქის განვითარებას და გამწვანებას ეხება, მათთან ერთად განვიხილავთ და საბოლოო, შეჯერებული ვარიანტი მათთან დისკუსიით და კომუნიკაციით მივიღებთ" - განაცხადა ნინა ხატისკაცმა.
მასალის გამოყენების პირობები
